Fermandarê HSD’yî yê Pêroyî Mazlum Ebdîyî vat ke têkilîyanê xo yê Konferansê Emnîyetî yê Munîhî de veng danê tepşê mîyanneteweyî yê hemparî yê seba Rojava û seba ke peymana 29ê çeleyî binpay nêbo garantîya mîyanneteweyîye waşt.
Ebdîyî vat ke aşma peyêne de Rojava de zaf bîyayîş û hêrişî bîyî û hêvîya înan a ya ke tepşêko hempar hemverê na rewşe de bivejîyo meydan. Vat ke peymana 29ê çeleyî est a û ganî binpay nêbo. seba ney her kesî ra, bi taybetî hêzanê garantoran ra garantîye waşte.
Ebdîyî vat ke Konferansê Munîhî rê bi hewayêko fermî ameyî dawetkerdene. Tayê hetan hemverê beşdarîya înan de bîyî la proses bi taybetî seba kurdanê Rojava daraxêko newe yo. Munaqeşayan de dî ke seba çareserîyêka ke hem hetê kurdan hem zî hetê hukmatê Sûrîye ra bêro qebulkerdene, nêzdîbîyayîş est o. Bi rayedaranê Şamî reyde verê zî munaqeşa kerdbî la teber ra reya verêne têkilîye ameye romayene.
Ebdîyî îfade kerd ke munaqeşayê xo yê Wezîrê Karanê Teberî yê Amerîka reyde meseleya garantorîye arde rojeve û Amerîka ra piştîdayîş ame waştene. Wezîrê Amerîka vatbî ke caardişê peymane waştişanê Trumpî ra yew o.
Ebdîyî vat ke dewletanê cîranan reyde têkilîyê daraxê neweyî est ê û Tirkîya rê zî kanalê akerdeyî est ê. Ebdîyî vat ke rayedarê Sûrîye ganî Îmralîyî reyde munaqeşa bikerê. Tayê wazenê ke mabênê kurdan û ereban de şer bivejîyo la bîyayîşê negatîfî nêwaneno ke kurd û erebî dişmenê yewbînan nîyê, Kobanê û Cizîrî de pîya ciwîyayî.
Ebdîyî vat ke tepşê şarî û dîasporayî tesîr keno nêzdîbîyayîşê hêzanê mîyanneteweyîyan ser o û dormeyê hêzanê Rojava de yewîye ameye temînkerdene. Ganî yewîya kurdî ya bihêze ya sîyasîye bivejîyo meydan û Rojava de rêxistinêka yewbîyaye ya kurdan bêra awankerdene.
Ebdîyî vat ke cinîyî do hêzanê emnîyetî de ca bigîrê: “Nebîyayîşê cinîyan artêşa Sûrîye de problemêk o. Hêzê cinîyan xeta ma ya sûr a. Ma vat ke her tugay de yew yewîneya cinîyan ganî bibo.”
Ebdî vat ke prosesî de zehmetîyî est ê û şoriş hertim bêqutbîyayîş nêşino la ê do seba resayîşê amancê xo têkoşînî bidomnê. Destkewteyê ke ameyî destgirewtene tena nîyê û heta ke statu bihêz bibo têkoşîn do dewam bikero.
