Meclîsê Dayîkanê Aştîye yê Amedî, hemverê hêrîşanê Tirkîya û SMO’yê ke Vakur û Rojhelatê Sûrîye yenê kerdiş, awanîya komelî ya Qezaya Rezanî (Baglar) de beyanatê çapemenîye da. Beyanatî de pankartê ‘Wa ENKS verfekîya şerê taybetî yê Tirkîya ra fek verado ‘ame akerdene.
Endama Meclîsê Dayîkanê Aştîye Kudret Eryilmaze va ma wazenê Kurdî çar parçeyanê Kurdistanî de bibê yew. Aye veng da Barzanî û ENKS’yî û wina va: “Ez sey yew maye şima ra vana, wa heme dezgehê Kurdan yew ca de bêrê têhet. Ma tena bi yewbîyayîşî eşkenê birînanê xo derman bikê. Ma milletêk ê ke heme dinya de vila bîyê, çira destê xo nêdanê têdest? Kurdistan gird o, bes o ma pêrune rê. Eke ma ewro nêbê yew, ma do yew bi yew vîndî bibê. Ti vanî ez serek a, ganî ti destê xo birayê xo yê Rojawanî rê derg bikerê. Bêrê ma pîya dest bidê yewbînan ke birînê ma weş bibê. Wa keda Rojawanî ma destî ra nêşêra. Ma Kurdî eke bibê yew, do heme dinya ma nas bikero, çareyêkê ma yê bînî çin o.”
‘Ti zî Kurd î’
Endama Meclîsê Dayîkanê Aştîye Hawa Kirane zî qisey kerde û va: “Ma ganî ma destanê xo bidê têdest û hemverê nê kayan ke heme dinya ser o bazirganî kena vinderê û Rojawanî rê wayîr vejîyê. Tîya ra ma veng danê ENKS û KDP.”
Kirane, Serekê KDP’yî Mesud Barzanî rê zî wina va: “Ti zî vaje êdî bes o, ma destê xo bidê destê birayanê xo. Ewro uca de çîyêk bibo, Vakur de zî, çar parçeyanê Kurdistanî de zî ganê kurdan nêdejno. Êyê ke do to reyde wirzê, do reyna Kurdî bê, ti zî Kurd î. Ganî gonîya ke Rojawanî de rişena vindera. Eynî çî ewro seba Şengal zî derbaz beno, ma vanê ke înan tena meverdê.”
Beyanat bi sloganê ‘Rojawa tena nîya’ qedîya.
