Meclîsê Şaredarîya Amedî ya Şaristanê Girdî, bi amancê asankerdişê resayîşê nêweşanê kanserî û hemwelatîyanê astengdaranê bedenî yê nêweşxaneyan, bi yewîya vengan herênayîşê 2 wesayîtanê resnayoxan qebûl kerd.
Meclîsê Şaredarîya Amedî ya Şaristanê Girdî, kombîyayîşê xo yê asayî yê aşma nîsane de, goreyê waştişê Serekîya Daîreya Xizmetanê Astengdar û Pîran qerarêko muhîm girewt. Çarçewaya pêşnîyazî de ke meclîsî de ame qiseykerdene, seba ke xizmetê “Taksîya Komelkîye” yo seba nêweşanê kanserî û resê hemwelatîyanê astengdaranê bedenî yê nêweşxaneyan bi hewayêko hîna tesîrdar dewam bikero, mesele ame erjnayene.
Qerarî de dîyar bî ke seba temînkerdişê domdarîya xizmetê mewcudî, berzkerdişê qalîteya xizmetî û zêdekerdişê resayîşî, hewcedarîya 2 wesayîtanê resnayoxan est a ke tewr kêmî 3 raywanan bigîrê, bi elektrîk, hîbrîd yan zî bi sotemenîya fosîle bixebitîyê û asansorê înan est bibê.
Dima nuştişê têkildarî yê Serekîya Daîreya Xizmetanê Astengdar û Pîran wanîya, mesele hetê endamanê meclîsî ra ame qiseykerdene. Peyê nirxnayîşan de, herênayîşê nê 2 wesayîtan ame vengdayene.
Qerar bi yewîya vengan qebûl bî
Goreyê madeyanê têkildaran ê Telîmatnameyê Xebate yê Meclîsê Şaredarîye, netîceya vengdayîşî de ke ame kerdene, waştiş bi yewîya vengan qebûl bî.
Bi nê qerarî, yeno amanckerdene ke resayîşê hemwelatîyanê astengdaran û nêweşanê kanserî yê xizmetanê weşîye bi hewayêko hîna xurt bêro kerdene.
