Nuştox Mehmed Uzun serrgêra xo ya 18. de wefatê xo de mezela xo ser o ame vîrardene.
Nuştox Mehmed Uzun serrgêra xo ya 18. ya wefatê xo de mezela xo ya Goristanê Berê Mardînî yê Amedî ser o ame vîrardene. Keyeyê Uzun, hemşaredar, xeylê nuştox, temsîlkarê partîyanê sîyasî û rêxistinê sîvîlî beşdarê vîrardişî bîyê. Vîrardiş hetê Şaredarîya Amedî ya Şaristanê Girdî û Komela Edebîyatkaran a Kurd ra ame kerdene.
Keyeyê Mehmed Uzunî ra Mustafa Uzun vîrardişî de qisey kerd û sipasîya Şaredarîya Amedî ya Şaristanê Girdî kerd. Cinîya Uzunî, Zozan Uzun zî behsê Mehmed Uzunî kerd û vat: “Vatişê ey her tim aramî û hêvî dayê mi. Bêrê ma pîya ey bi heskerdiş û hêvî bipawê.”
Sekreterê PENa Kurd Azad Zal zî dîyar kerd qelema Uzunî hema zî nusena û metnêko ke Uzunî nuştbi, ey wend.
Nuştox Hecî Ozkalî zî vat: “Wa rehet rakewo, ma do Kurdîstana azade de berhemanê ey vila bikerê.”
Hemşaredarê Şaredarîya Amedî ya Şaristanê Girdî Dogan Hatunî zî vat: “Ey taritî de mumêke veşnaye. Ewro eke ma bi ziwanê xo qisey kenê û nusenê, dilopêke encamê keda Uzunî yo.”
Estanekvatox Ayhan Erkmenî zî şîîre wende.
Mezele ser o ronayîşê vilikan ra pey, programê vîrardişî qedîya.
