Sîyasetmedaro kurd Mehmet Çakaso ke bi îdîaya endamîya PKK’yî Zîndanê Uelzenî yê Almanya de yeno tepiştene, yeno pawitene ke do 2yê teşrîna verêne de bêro tehlîyekerdene. Aktîvîstî plan kenê verê zîndanî de şirê vera ey.
Mehket Çakasî seba ke heq û nasnameyê şarê kurdî bêro naskerdene têkoşîn kerd. Par bajarê Celle yê Almanya de ame muhakeme kerdene û bi îdîaya endamîya PKK’yî di serrî û des aşmî cezaya zîndanî dîyaye ci. Çakaso ke nizdê hîrê serran zîndan de mend, 2yê teşrîna verêne de do bêro tehlîyekerdene. Nika derheqê prosesanê huqûqî zanayîşo bîn zelal nîyo la akktîvîstan da pêhesnayene ke ê inkey ra plan kenê verê zîndanî de şirê vera ey.
Demê peyênî de seba ke Mehmet Çakas Tirkîya rê nêro teslîmkerdene bi hewteyan protestoyî ameyî kerdene. Seba ke îltîcaya Çakasî ameye redkerdene Almanya waşt ey bişawo Tirkîya la rêxistinanê heqanê mediman no rexne kerd û vat Tirkîya de zexto sîyasî, îşkence û tehdîtê giranî ey pawenê.
Amebi plankerdene ke 28ê tebaxe de Çakas bêro tebersînorkerdene la rojekê verê ci na roje mehkeme qerar betal kerd. La hema zî statuyê pawitişî yo mende yê Çakasî çîn o. 24ê teşrîna peyêna 2025î de Mehkemeya Îdareyî ya Luneburgî de na rewşe do bêro destgirewtene. Mehkme do qerar bido ke rixmê qeraranê pawitişî yê Ewropa û Almanya îadekerdişê Tirkîya qanûnî yo ya nê.
