Hemverfeka HDK’yî û parlamentera DEM Partî Merale Daniş Beştaş îfade kerd ke bi raporê hemparî problemê kurdan temamî nêyenê çareserkerdene û vat: “Çîyo muhîm akerdişê rayîrê sîyasetê demokratîkî yo. No zî game bi game beno.”
Komîsyonê Meclîsî vizêrî bi kombîyayîşê xo yê 21. xebatê xo qedînayî. Raporo hempar ke 60 rîpel û 7 babetan ra pêameyo bi raydayîşî ame qebulkerdene. TÎP û EMEPî neyînî rey da. Rapor bi 47 venganê DEM Partî, AKP, MHP, Grûba Yenî Yolî û endamê bînan ê CHPyî ame qebulkerdene.
Beştaşe vat: “No seba tarîxê meclîsî zî zaf muhîm bî. Komîsyonî îradeyê xo zelal kerd. Nika muhîm o yo ke dima do se bibo. Tayê fikrê ma yê cîya zî est bî. Sey şuxulnayîşê çekuya ‘terorî’. Goreyê ma raşt nîya û ma qebul nêkerd. La mumkun nêbî ke heme waştiş û pêşnîyazê ma raporî de ca bigîrê.”
Derheqê heqê hêvîye de Beştaşe vat: “Seba ke proses bi serkewtiş bireso netîce ganî Birêz Ocalan azad bo. Aktoro esas ê prosesî Birêz Ocalan o.” Beştaşe dîyar kerd ke raporî de seba endamanê rêxistine badê çekverdayîşî qanûno taybetî ke wa bikewê sîyasetê demokratîkî ca girewto û vat: “Ma wazenê ke verê Roşanê Remezanî babetanê ke raporî de ca girewt, sey qanûnî bivejîyê.”
Beştaşe vat: “Ma nêeşkenê vajê ke demêko kilm de meseleya kurdan temamî do bêro çareserkerdene. Qanûnê bingeyî de hemverê heqê neteweyî û statuyê kurdan de zaf astengî est ê. Coka 2 aşmî û serrêk de her çî çareser nêbeno. Çîyo muhîm akerdişê rayîrê sîyasetê demokratîkî û waranê bînan o.”
