Mêrsîn de qezaya Tarsus û çamliyayla de, kesêk bi nameyê Metîn O. cinîya kê pîya zewacîya bî zî tede 6 kesî qetil kerdî û dima ra xo kişt.
Vizêrî şande Metîn O. (37) taxa Kadelli ya girêdayê Tarsusî de aşxaneyêk gulebaran kerd, wayîrê aşxanî Sabrî Pan û xebatkarê aşxanî Ahmet Ercan ameyê kişten. Hêrişkar badê ke cayê hedîse ra rema û îstasyonê benzînî yê taxa Yenîkoy de şoforê tire Gokay Selfîoglu zî kişt.
Hêrişkar dima ra taxa Daripinarî yê girêdayê Çamliyayla de Arzu Ozden a pîya zewacîya bî zî kişte. Taxa Yenîkoy de zî Abdullah Koca bi motorsîkletî eşt şarampol û kişt. Hêrişkar wextê remayîşî de taxa Karakutuke de ciwano şiwane nameyê ey Yusuf Oktay zî kişt. Kiştox wextê remayîşî de serê rayîrê xo de pêroyî 8 kesî zî birîndar kerdî. Birîndarî berdî Nêweşxaneyê Dewlete yê Tarsusî.
Badê nê kiştişan, cendirmeyan seba girewtişê hêrişkarî operasyonêko hîra da dest pêkerdene. Rocigêrayîş bi desteke helîkopterî de wesayîto ke hêrişkar pê remabî dewa Karakutuke de ame vînayene.
Operasyonê seba zanayîş û dîyayîşê cayê kiştox Metîn O. heta serê sibayî dewam kerd. Rocigêrayîşê cendirmeyan de ame dîyar kerdene ke gumanbar dewa Karakutuke, herêma Çokake de banê ke de xo nimito. Operasyonêko ame viraştene de, hêrişkarî wexto ke fehm kerd ke do bêro girewtene bi çek xo kişt.
