Mîtîngê Wanî de bale ancîyaye vengdayîşê Rayberê Şarê Kurdî Abdullah Ocalanî yê Aştî û Komelo Demokratîkî ser o û ame dîyarkerdene ke nê prosesî ra do her kes bi qezenc vejîyo û seba nê zî ganî her kes wayîrê prosesî vejîyo.
Wan de 1ê Gulane pêşengîya DÎSK,KESK, Odeyê Wan û Colemêrgî, Odeya Doktoranê Dindanan û TMMOB’î de mîtîng yeno kerdene. Mîtîngî ra ver bi hezaran kedkarî vernîya AVMya Gunpaşî de kom bîyê û bêmaben siloganê “Biciwîyo 1ê Gulane”, “Kede yê ma ya, vatiş yê ma yo”, “Do KHK’yî şêrê, ma bimanî” vatî û dima zî ver bi Parka Musa Anterî rayra şîyê.
Verê kortejî de zî endamanê MKG û DFG’yî ca girewt. Rojnamegeran pankartê “Çapemenîya Azade, Komelo Demokratîk” akerd. Mîtîng de vindertişê hurmetî ra pey, nameyê komîteya tertîpî ser o Engîn Işik qisey kerd.
Wa heqê hêvî bêro caardene
Hemşaredarê Şaredarîya Wanî ya Şaristanê Girdî Abdullah Zeydan zî vat ke mesajê Birêz Ocalanî hêvîyêk awan kerd û wina va: “Senî ke şerî de her kes vîndî keno, do bi nê vengdayîşî zî her kes qezenc bikero. Ganî her kes wayîrê nê prosesî vejîyo û hetkarî bido. Ganî polîtîkayê qeyumî ra fek veradîya, hepsîyê nêweşî bêrê veradayene. Ma do têkoşînê xo bidomnî.”
Endama MYK’yî ya KESK’î Done Gevher Koyun dîyar kerd ke nika şarî verba sefaletî de xover danê, reyna Rojhîlato Mîyanênî de polîtîkayê lêşînî yenê kerdene û wina domna: “Hewna wazenî îradeyê şarî xesp bikerê. Ma êdî qebul nêkenê. Wa bizanî ke ma do her tim têkoşînê xo bidomnî. Ganî seba aştî û demokrasî qanûn bêrê vetiş û no şer zî biqedîyo.”
