Mîtîngê “Hêvî û Azadîye” ke do bi waştişê azadîya fîzîkî ya Rayberê Şarê Kurdî Abdulalh Ocalanî 4ê çeleyî de Amed de biameyêne kerdene, seba şertanê xirab ê hewayî ra seba tarîxêko aver ame taloqkerdene.
Platformê Sazgehanê Demokratîk do 4ê çele de seba azadîya fîzîkî ya Rayberê Şarê Kurdî Abdullah Ocalanî Qadê Îstasyonî yê Amedî de mîtîngê “Hêvî û Azadîye” organîze bikerdêne. Mîtîng seba şertanê xirab ê hewayî ra ame taloqkerdene. Komîteyê amadekar ê mîtîngê “Hêvî û Azadîye” awanîya Rêxistina Partîya Têduştî û Demokrasî ya Şaran (DEM Partî) a Amedî de derheqê babete de eşkerayî daye.
Ewilî Hemserekê DEM Partî yê Amedî Abbas Şahînî qisey kerd ke 27ê sibate de Rayberê Şarê Kurdî Abdullah Ocalanî vengdabi û vatbi ke ez eşkena prosesê şer û pêkewtişan ra bîyarqa zemînê huqûq û sîyasî ser o û wina vat: “Ganî no proses meclîs de û zemînê huqûqî ser o rayra şîro.Seke yeno zanayene ma dîyar kerdbi ke ma do seba azadîya Rayberê Şarê Kurdî Abdullah Ocalanî mîtîngêk organîze bikerdêne. La seba rewşa hewayî ya xirabe ma mîtîngî taloq kerd.”
Metnê eşkerayî hetê Hemserekê MED-DER’î Mehmet Remzî Azîzoglu ra ame wendene.
‘Mîtîngê ma nika ra resa amancê xo’
Mehmet Remzî Azîzogluyî dîyar kerd ke mîtîngê “Hêvî û Azadîye” ke do 4ê çele de biameyêne organîzekerdene, seba rewşa hewayî ya xirabe, hetê komîteyê amadekar ra seba demêko averêr ame taloqkerdene û vat: “Amadekarîyanê mîtîngî de ame vînayene ke waştişê azadîya Rayberê Şarê Kurdî Abdullah Ocalanî hetê komelî ra bi hewayêko xurt ame mojnayene. Bi nê munasebetê mîtîngê ma nika ra resayo amancê xo.”
