Desteya Serekîye ya MSD’yî kombîyayîşê xo yo asayî de rêbazanê çalakîkerdişê prosesê sîyasî yê Sûrîya ser o munaqeşa kerd. MSD’yî vengdayîşê destpêkerdişê dîyalogêko hîra seba caardişê hemkarî û edaletî kerd.
Desteya Serekîye ya Meclîsê Sûrîya Demokratîke (MSD) kombîyayîşê xo yo adetî Hesekê de kerd. Hemserekê MSD’yî Leyla Qereman û Mehmud El Muslit bi rayîrê vîdeoyî û hemsereka Dayîreyê Têkilîyanê Teberî ya Rayberîya Xosere Îlham Ehmed û endamê meclîsî beşdar bîyê.
Kombîyayîşî de averşîyayîşê sîyasî yê Sûrîya ameyê munaqeşakerdene. Leyla Qereman qiseykerdişê xo de dîyar kerd ke prosesê vîyartişî, herinda ke bibo rayîrê çareserî, bîyo cayê kaosî û vat: “Peygoşkerdiş şaran nêkeno yew û şîdet dewletêk awan nêkeno. O ke ewro yeno waştene, bingeyê hemkarî ser o destpêkerdişê projêyêka neteweyî ya hîra yo.”
Leyla Qereman derheqê hedîseyanê peyên ê Siwêda de zî waştişê cipersayîşêko xoser kerd, bi taybetî yê vera cinîş û gedeyan û vat: “Ganî bingeyê awankerdişê Sûrîyayêka newa bi edalet bo.”
‘Ganî heme temsîlkarê cayê xo bigîrê’
Hemsereka Dayîreyê Têkilîyanê Teberî yê Rayberîya Xosere Îlham Ehmed zî dîyar kerd ke merkezînêkerdiş êdî weçînekêk nîyo, lazimtîyêk o. Îlham Ehmed da zanayene ke her çareserîyêka sîyasî bêyî beşdarbîyayîşo rastîn ê heme temsîlkaranê Sûrîye, do tena bibo sebebê kaos û rijîyayîşî.”
Peynîya kombîyayîşî de Desteya Serekîya MSD’yî waştişê caardişê peymana 10ê adare ya mabênê Hêzanê Sûrîya Demokratîke û hukmato demkî yê Şamî kerd. Reyna waşt ke dîyalogêko hîra bibo ke hemme hetî û temsîlkarê sîyasî, komelkî, etnîk û dînî cayê xo tede gênê.
Reyna MSD’yî da zanayene ke do seba Sûrîyeyêka dadmend û sîvîle ke waştişanê şarê Sûrîya açarneno rastîyêka ke çiman ver de ya, xebatanê xo bidomnê.
