Hunermendo kird Mucahît Goker va ke o zonê xora zaf zaf hes keno û wina va: “Tena bi vatişê ma zonê xo rê xizmet kenî, nêbeno. Ez zonê xora zevk gêna, hem zî zerrî ra vana. Çi destê mi ra bêro, ez bena şa.”
Hunermendo kird, Mucahît Goker 21ê Hezîrana 2025î de bi nameyê “Venik”î de albumêk vet. Albumê Gokerî de hewt hebî deyîrî est ê û nê deyîran ra 2 hebî kurmanckî 5 hebî zî kirdkî yê. Album de nê deyîran ca gênê; 1. Ka Ew Deşt, 2. Esmer, 3. Berenge, 4. Venik, 5. Pêrîzade, 6. Nêmend û 7. Day Lêyro.
Hunermend Mucahît Goker derheqê albumê xo û rewşa kirdkî ser o ajansê ma rê qisey kerd.
Hunermend Mucahît Goker xo wina da şinasnayîş: “Ez Darahênî ra ya û emrê mi 62 serre ya. Qijîya mi Dara Hênê de vîyarte. Mi mektebo vêrên Dara Hênê de, dima zî mektebo werte û lîse mi Çolîg de wend. Badê mi Wan de mektebê mualîmîye ser wend û 25 serrî mi karê mualîmîye kerd. Mualîmîya mi ser sinife bî û mi dima zî 4 û 5 serrî mualîmîya muzîkî kerde. Kayserî, Semsûr, Çolîg û badê ci zî Mêrsîn de mi karê mualîmî kerd û nika teqawud a.”
‘Mi no kompleks uca de hîs kerd’
Mucahît Gokerî seba karê muzîkî ser o va ke qijiya xo de heskerdişê muzîkî kerdo, hetta o hîna şenik bîyo; o berdo yew bi yew sinifande pê deyîrî dê vatiş.
Mucahît Gokerî wina domna: “Keye de zonê dadîya mi xo ra kirdkî bi, mekteb de hêdî hêdî ma de ferqê kirdkî û tirkî dest pêkerd. Lajê polîs, hakîm ya zî mualîmo xerîb, înan serê destan biyî û verê çiman biyî. Hem dersê înan hîna hol bî û çimê mualîmî de hîna qiymetir biyî. Mi no kompleks uca de hîs kerd. Demo ke dersê ma xirab bîyêne, kekê min o ke fakulte wendêne yê ma ra vatêne ke ‘şima keye de kirdkî qal kenê ayera dersê şima hol nîyê’ û nêewtarêne ma de kirdkî qal bikero. Yew kekê mi bî, yê ma hîna serbest veradaynî û ma reyde kirdkî qal kerdêne.”
‘Ez unîversîte de nota musa’
Gokerî eşkera kerd ke muzîk xora zerîya ci de estbîyo û qiseyê xo wina domna: “Xuyê mi biney şermonêk bi. Badê ci mi zaf waştî, tembur bimuso. La Dara Hênê, welatê ma de, kulturê ma şafîyî ser bi. Dormeyê ma de, keso ke tembur bicino çin bî ke mi rê emsal bibo. La o hewes her tim zerrîya mi de bi, yew temburo şikite kewt destê mi, yew ciranê ma ra. Ser tembur de yew ya zî di têl tena est bi. Mi destê xo sero gêrînayêne. O wext televizyon zî çinî bi, ma ser radyo goşterî kerdêne. Badê lîse de temburêko hol kewt destê mi; kekê mi, mi rê girewt. Beno ke mi teknîkê şaşî girewt la xo ser têlan ser gêraya. Unîversîte de ma, dersê muzîkî de note musayî. Dima zî mi waşt ders bidî qijan; Mêrsîn de mi waşt dima teqawudîye, kursê temburî biakero.”
‘Zonê ma rê destûr nêdaynî’
Goker bal ant ser serranê 90î û wina dewam kerd: “Verê ci mi xora çend heb deyîr nuştîbi, nê deyîran verê serranê 90î Dara Hênê de mi nuştbi. Çi heyf ke zonê ma rê musade nêkerdêne, 2009 de ez teqawud bîya. O wext êdî hîna zaf wextê mi bi ke ez ser muzîkî bivindera. Album de 6 heb deyîr û muzîkê ci ê mi bîyî, 2 heb zî embazan bîyî. Êdî îmkanê mi, hîna zêde bi ke, ez muzîkî ser bişuxula. Ez eşkena bi rehetî bivaja ke repertuara mi ya tirkî hera ya, mi qijîya xo de Neşet Ertaş, Aşik Mahsunî û Arîf Sax xo rê model girewtêne. Ez zonê xo ra zaf zaf hes kena. Tena bi vatiş zonî rê xizmet nêbeno. Ez zonê xora zevk gêna û zerrî ra vana. Çi destê mi ra bêro, ez bena şa. Zonê ma de demo vîyarte de bawanê ma û qalanê ma zaf weş qal kerdêne. No ser zî gerekî no zon vînî nêbo, aver şîro. Semedê zonî çi lazim o, perwerdeyî lazim o. O zono ke ma xeber danî, gerekî qijê ma zî pê îdareyê xo bikerî. Wexto ke zonê xo de mekteb qedîna û dîploma girewt, hem îdareyê xo biko hem zî zevk bigo. Zonê dadîya xo de xo bîyaro zonî. Meseleya zonî de sereyê ma zaf zelal nîyo, hetanî nika zon ameyo, çi heyf ke rewşêka weş de nîyo. Demo ke Meclîs de zonê xo dir qal kenî, sekî înan rê zewt kenî, zonêko nîno zanayîş nîşan danê. Seba averşîyayîşê zonî, xebatêka sazûmanî ci rê lazim o, çi heyf ke hunermendê verê ma, ma rê arşîv nêveradayî, mîyanê 30 serrî de zaf hûmarî de çi nusîyayî û qeyîd bîyî zonê ma de. Seba averşîyayîşî rê cehd lazim o.”
‘Albumê Venik aşma hezîrane de vejîya’
Gokerî vatişê xo wina qedîna: “Albûmo verên 2013 de mi Darahênî de vet, 4 hebî deyîr nika ci rê vanî single. No album zî 4 serrî verî hadre bi, mi waşt wa çend hebî besteyê mi bibî û çend hebî gelerî (anonim) bibî. Encax ez eşkîyeya, bi îmkananê xo emserre biqedîne. Aşmêka album vejîyeya, aşma hezîrane de vejîya û nameyê ci Venik o. Xora yew deyîr nameyê Venik est o, embazê mi yê erjîyaye o zî Dara Hênê ra yo Serdar Keskîn besteyê ci ma pîya viraştî. No album de di hebî kurmanckî zî deyîr est ê, ê bîn 5 heb kirdkî yê, çend hebî yê mi yê û çen hebî zî gelerî yê. Ez vana behsê deyîrê kurmanckî Pêrîzade bika, Pêrîzade; ez qijîya xo de dadîya xo goştarita, dadî û bawê mi kurmanckî zî zanaynî. Dadîya mi demo ke qehîryayne, na deyîr vatêne. Ez ko tembur musaya, ray ray mi cinitêne dadîya mi vatêne; badê zî mi nuşt. Dima zî kewt vîra mi, mi bikera deyîre û hîrî qita mi ard yew ca, ez wazena semedîya ci klîbêk bianca la klîbê ci hema zî menda.”
