Muzîkjen Haşîm Reşadat o ke Merkezê Kulturê yê Anatolîya de perwerdeyê muzîkî dano domanan, kitabêko bi nameyê “Cîhana Zarokan” (Dinyaya Domanan) ke seba perwerdeyê metalofonî yê, amade kerd. Taybetmendîya kitabî o yo ke kitabê perwerdeyê Metalofonî yo verên yo ke bi kurdkî yo.
Muzîkjen Haşîm Reşadat o ke bi eslê xo şaristanê Mahabadî yê Rojhelatê Kurdîstanî ra yo, Merkezê Kultur, Huner û Edebîyatî yê Anatolîya de ke Enqere de ya, perwerdeyê muzîkî dano domanan. Haşîm Reşadat o ke perwerdeyê Metalofonî dano domanan, seba perwerdeyî kitabêko bi kurdkî zî amade kerdo. Kitab paweno ke bêro çapkerdene. Kitabê bi nameyê “Cîhana Zarokan” kitabê perwerdeyê Metalofonî yo verên yo bi kurdkî yo. Kitabe şîîranê Ferîde Aktare ra yena pê. Her wina wênesaze Jhaleh Reşhad zî seba kitab wêne xêz kerdê û dîzaynerê qapax û rûpelan zî Delnia Khadivande kerdo. Kitab şîîr û wêneyan ra yeno pê û bi taybetî seba perwerdeyê Metalofonî yo.
Muzîkjen Haşîm Reşadat o ke 35 serrî yo bi karê hunerî mijûl beno û hem Rojhelatê Kurdîstanî de hem zî Bakurê Kurdîstanî û Tirkîya de xebatê muzîkî kerdê û 5 serrî yo Enqere de ciwîyeno, derheqê kitabê “Cîhana Zarokan” de Ajansê Welatî (AW) rê qisey kerd.
Notayê 220 deyîran çap kerdê
Haşîm Reşadatî ard ziwan ke o verê destê mamostayanê namdaran de bonderê muzîkî bîyo û Rojhelatê Kurdîstanî de zî serranê dergan karê muzîkî reyde mijûl bîyo. Haşîm Reşadat o ke heta nika seba perwerdeyê muzîkî 2 kitabî çap kerdê, behsê xebatanê xo kerd û va: “Min şîîr û deyîrê Hîlmî Akyolî goreyê muzîkî kerdî nota. Min notayê nêzdîyê 220 stranan seba perwerdeyî nuştî. Ez perwerdeyê muzîkî dana domanan. Bi taybetî zî metalofonî ser o perwerde dana. Rojhelat de zî min perwerde dayêne domanan. Tîya zî ez perwerdeyê Metalofonî dana domanan. Mi tim hewl dayêne ke seba domanan kitabêko Metalofonî yo bi kurdkî çap bikero.”
Kitabê kurdkî yo Metalofonî ya verên
Dewamê qiseykerdişê xo de Haşîm Reşadatî derheqê kitabê xo ya peyêne “Cîhana Zarokan” ke kitabê Metalofonî yo verên yo kurdkî yo û paweno ke bêro çapkerdene de wina va: “Min seba domanan kitabêko metalofonî amade kerd. Nika paweno ke bêro çapkerdene. Kitabêko perwerdeyê Metalofonî ya seba domanan a bi kurdkî çin o. No kitabo verên o. Mîyanê kitabî de şîîrî, deyîrî û wêneyî estê. Kitab, bi taybetî seba perwerdeyê Metalofonî yo. Êdî xebata kitabî qedîyaya. Nê rojan de do bêro çapkerdene. Domanî tîya bonderê Metalofonî benê û hişê muzîkî yê înan yeno pê. Badê ke bîyî 10 serre, êdî ê eşkenê goreyê xo beşêkê muzîkî û silgirêk weçînê. Min hewl da ke tecrubeyanê xo yê serran bi no kitab seba domanan kitabêko perwerdeyî amade bikero. Kitab taybet seba domanan hem muzîk, hem şîîre û hem zî wêneyan ra yeno pê. Eke domanêk no kitab de bonderê metalofonî bibo, eşkeno bi xo zî silgiranê Metalofonî bimuso. Ez wazena hem muzîkê kurdkî hem zî ziwanê kurdkî bonderê domanan bikera.”
‘Huner de sînor çin o’
Peynîya qiseykerdişê xo de zî Haşîm Reşadatî dîyar kerd ke muzîkê kurdkî wayîrê dewlemendîyêka girde yo û va: “Muzîkê kurdkî zaf nêbîyo akademîk. Muzîkêko xozayî yo. Ziwanê kurdkî zaf dewlemend o. Muzîkê kurdkî zaf dewlemend o. Her çar parçeyanê Kurdîstanî de zî ez muzîkê kurdkî teqîb kena. Berhemê zaf dewlemendî vejîyenê. Kurdîstan çar parçeyî yo la muzîk de çar parçeyî çin ê. Huner de sînorî çin ê. Huner de çar parçeyê Kurdîstanî resayê pê. Rojhelat seba Rojawanî berhemanê hunerîyan afirneno her wina Rojawan zî wina. Başûr û Bakur zî wina. Huner de sînorî çin ê.”
