Verfeka SMJÊ’yî Nujîyane Gunaya ke bi wesîleya serrgêra Fermanê Şingalî, vat ke semedê caardişê edaletî gerek xoserîya Şingalî bêro naskerdene û mehkemeyêka taybete ya mîyanneteweyîye bêro ronayene.
3ê tebaxa 2014 de çeteyanê DAIŞ’î Şingal de 5 hezarî ra zafêr êzidîyî qetil kerdî, zafê înan cinî û domanî bi hezaran êzîdîyî remnayî. Rixmo ke qirkerdişî 11 serrî xo dima veradayî bi hezaran domanî hema vînîbîyayeyê. Êzidîyê ke tarîxê xo ra raştê 73 fermanan ameyî, nê sey Fermanê 74. hesibnenê.
Qirkerdişê vera êzidîyan serî de Amerîka, Fransa, Almanya û Îngîlîstan hetê xeylê dewletan ra sey qirkerdişî ame qebulkerdene. Vervatoxa Sîwana Meclîsên Jinên Êzidî (SMJÊ) Nujîyane Gunay ajansê ANF’î rê derheqê babete de qisey kerd.
Gunaye vat semedê caardişê edaletî gerek xoserîya Şingalî bêro naskerdene û mehkemeyêka taybete ya mîyanneteweyîye bêro ronayene.
Nujîyane Gunaye verî şehîdê Fermanê 74ine yad kerdî û nê vatî: ”Bêşik badê fermanî Ewropa de rêxistinanê cinîyan ê êzidîyan sey SMJÊ û komelê êzidîyan NAV-YEKî seba ke cewabê fermanî bidê zaf cehd kerd. Xebatê dîplomasîyî rayra berdî ke ferman sey qirkerdişî bêro naskerdene. Xeylê welatan no qebul kerd la hema zaf welatan qebul nêkerd. Ferman sey qirkerdişî ame naskerdene la serê kagitî de mend. Qirkerdişî 11 serrî xo dima verdayî la hema êzidîyî nêeşkenê agêrê herra xo. Semedê çareserkerdişê meseleyan komîsyonêk nêame ronayene. Xebatê ke semedê newera înşakerdişê Şingalî ameyêne rayraberdene ameyî vindarnayene. Ameyoxê êzidîyan nêgerîya binê kontrolî. Êzidîyî hema binê tehlukeyî de yê. Fermanê 3ê tebaxe hema dewam keno.
Eke xoserîya Şingalî bêro naskerdene, peynîyê fermanî yeno. Seba ke şarê êzidîyan xo bi xo nêpawine, rêxistinkerde nêbi, raştê qirkerdişî ame La badê qirkerdişî komelê êzidîyan xo wela xo ra newera afirna. 2015 de TAJÊ (Tevgera Azadiya Jinên Êzidî) Şingal de ame ronayene; eynî wextî de YBŞ û YJŞ ameyî ronayene. Hetê bînî ra PADÊ warê polîtîk de sey vengê êzidîyan ame ronayene. Êzidîyî ewro wayîrê îradeyî yê, rêxistinkerde yê, pawitişê ci est o. Her warî de aîdê xo yê. Semedê ma yewna rayîr çîn o. Ma mecburê ke qeraranê xo bi xo bigîrê. Naskerdişê xoserîya Şingalî fermanî qedînena. Kam ke na xoserîya nas nêkeno verê fermanî bînî akeno.”
