Domanê ke bi perwerdeyê tembûr û muzîkî yê muzîkjen û şefê koroyî Serdar Baysalî (ke bi KHK karê xo ra ameyo kerdene) ameyê têhet. Domananê ke bi kurdkî (Zazakî û kurmanckî) û tirkî eserî vatî û da dîyarkerdene ke muzîk înan ano têhet û domananê bînan ê Antalya rê zî veng da ke wa beşdarê xebatanê winayîyan bibê.
Domanê ke bi perwerdeyê tembûr û muzîkî yê muzîkjen û şefê koroyî Serdar Baysalî (ke bi KHK karê xo ra ameyo kerdene) ameyê têhet, hem xebatanê xo hem zî hîsê vatişê kilamanê bi ziwanê dayîke PÎRHA rê qisey kerd. Domananê ke bi Kurdkî (Zazakî û kurmanckî) û tirkî eserî vatî, da dîyarkerdene ke muzîk înan ano têhet û domananê bînan ê Antalya rê zî veng da ke wa beşdarê xebatanê winayîyan bibê.
Domananê ke qezaya Kepezî ya Antalya de beşdarê xebatanê tembûr û koroyî yê, gîreyê xo yê bi muzîkî û cayê nê prosesî yê cuya xo de qisey kerd.
‘Dayîşê tembûrî û vatişê kilaman merdiman anê têhet’
Berxwedan Ekdemirî dîyar kerd ke o Amed de ameyo dinya, 2019 de keyeyê xo reyde bar kerdo şîyo Antalya û di serrî verê cû beşdarê Koma Aryenî bîyo. Ekdemirî eleqeyê xo yê bi tembûrî wina ard ziwan: “Mi verê cû tembûr goşî ra dayêne la mi ferq kerd ke goşî ra dayîş bes nîyo. Mamosta Serdarî ma rê dayîşê bi notayan musna. Çîyêko sey averberdişê kurdkîya mi û dayîşê tembûrî û vatişê kilaman weş çin o. Muzîk merdiman ano têhet.”
‘Her çî Newroza 2022yî de dest pêkerd’
Fatîma Yeter a ke eslê xo Mêrdîn ra ya û 5 serrîya xo de bar kerdo şîya Antalya, da zanayene ke a bi şayîya Newroza 2022yî muzîk şinasnayo. Yetere va ke aye bi saya nê kursî dayîşê erbane musaya û wina dewam kerd: “Ez bawer kena ke na kome do pîl biba.”
‘Mi 8 serrîya xo de dest pêkerd, hema bi eynî heyecanî dewam kena’
Avşîn Solmaz a ke Antalya de ameya dinya, dîyar kerd ke a Newroza 2022yî de beşdarê kome bîya û va: “Wexto ke mi dest bi kursê tembûrî kerd, ez 8 serre bîya, nika 11 serre ya. Hîrê serrî yo ez dewam kena. Bi saya Mamosta Serdarî ma ameyê nê rojan.”
Solmaze va ke destpêkerdişê aye yê tembûrî de xeyalê maye ya aye o ke nêmcet mendbî, tesîr kerdo.
‘Xeyalê dayîka mi ma rê bî nesîb’
Jîyan Ozçakan a ke eslê xo Riha ra ya, dîyar kerd ke destpêkerdişê aye yê tembûrî de waştişê dayîka aye tesîr kerdo û va: “Semedo ke ez kurd a mi tewr zaf tîya tercîh kerd. Ez hunermenda cinî ya kurde Ayşe Şane xo rê sey nimûne gêna. Mi bi hewesêko weşî dest pêkerd û dewam kena.”
Zeynep Fîdan Ozçakane zî da zanayene ke domanîya xo ra nata waşta enstrumanêk bimusa û va: “Mi texmîn nêkerdêne ke tembûr hende weş o. Zehmet o la zaf bi mana yo. Mamosta Serdarî tena muzîk nê, ziwanê ma yê dayîke zî ma musna.”
