Hemsereka DEM Partî ya Amedî Gulşen Ozer ard ziwan ke înan semedê Newroza Amedî ke do 21ê adare de bêro pîrozkerdene, hazirîyê xo qedînayî û vat, “Ma do warê şayîye de pîya bi şarê xo semedê aştîye biqîrê.”
Newroza Amedî do 21ê adare de bi şîarê “Rayberîya Azade, Komelo Demokratîk” û “Semedê Azadîye Newroza Komelê Demokratîkî” Parka Newroze ya qezaya Rêzanî de bêro pîrozkerdene.
Serekê Komîteya Hazirîya Newroze û Hemsereka DEM Partî ya Amedî Gulşen Ozer derheqê hazirîya Newroze de qisey kerd.
Gulşen Ozere nê vatî: “Bi vengdayîşê 27ê sibate yê Birêz Ocalanî hazirîya ma dest pêkerd. Mesajî rengê xo da 8ê Adare ro. Cinîyî do ruhê 8ê Adare bikirişê warê Newroze. Bi nê coşî pêro şar mîyanê hazirîya Newroze de cayê xo geno. Şar do bi waştişê na Newroze bibo Newroza haştîye û azadîye do vejîyo waran. Ma zî biheyecanî xebatanê xo rayra benê. Senî ke Birêz Ocalanî vat, ‘Na serre do biba serra azadîye.’ Bi nê şîarî ma pawenê ke her kes verê xo bido warê Newroze.
Ma cinîyî do bi govede, reng û coşê xo vejîyê waran. Ma hesretê haştîye yê. Her roje cinîyî, domanî yenê qetilkerdene. Eke komelo demokratîk bibo, cinî, doman û xoza nînê qetilkerdene. Hêvî û xeyalê ma no yo.
Newroze xoverdayîş û serewedaritiş o. Têkoşînê vera Dehaqan o. Xoverdayîş û hîşyarbîyayîşê xoza yo. Newroze xeberê aştîye û azadîya dana. Ma do Newroze de reyna pêro pîya semedê azadîye û aştîye biqîrê.”
