Serekê Egîtîm-SEN’î Şûbeyê 2. yê Amedî Serhat Kiliç û Mamosteyê Kirmanckî Nesîp Gultekîn derheqê kampanyaya “Rojawanî rê statu, şaran rê azadîye” de qisey kerd û vat: “Seba ke Rojhelato Mîyanên de şer biqedîyo ganî statuyê Rojawanî bêro naskerdene.”
419 partî, sazî û rêxistinan 26ê çeleyî de Amed de kom bîyê û kampanyaya “Rojawanî rê statu, şaran rê azadîye / Ji Rojava re statu, ji gelan re azadî” îmze kerd û raya pêroyî reyde pare kerd. Beyanatê sazîyan de vengdayîşê şinasnayîşê statuyê Vakur û Rojhelatê Sûrîye ame kerdene ke hedefê hêrişan o.
Serekê Egîtîm-SENî Şûbeyê 2. yê Amedî Serhat Kiliç qisey kerd û bale ant şero ke Rojhelato Mîyanên de qewmîyeno û vat: “Seserrîyo ke Rojhelato Mîyanên de bi taybetî Sûriye de şer nêvinderto. Seba no şer biqedîyo û aramî bêra Rojheleto mîyanên ma vanê “Rojawanî rê statu, heme şaran rê azadîye.”
‘Bi yewrengîye rayberdiş ameyo ferzkerdiş’
“Seserrîyo ke Rojhelato Mîyanên de bi taybetî Sûriye de şer nêvinderto. Çira wina beno? Nika Rojhelato Mîyanên de gelekî şarî ciwîyenê. Hem nasnameyê etnîkî hem nasnameyê dînî heme hetî ra zaf cîyayî pîya ciwîyenê. La seba komel û şaranê Rojhelatê Mîyanên rê çîyêk ameyo ferzkerdiş. Bi yewrengîye rayberdiş ameyo ferzkerdiş. Cayêk de tirkey bîya ferz, cayêk de erebîye bîya ferz, cayêk de farisîye bîya ferz. La rastîya nê şaran na nîya. Rojheleto Mîyanên de ne ke yew dewlet û yew erdnîgarîye de ti nêşkenê yew dewe bivînê ke tena nasnameyêk ra yena pê.”
‘No şer bi naskerdişê statuyê Rojawanî eşkeno vindero’
Serhat Kiliç dîyar kerd ke seba ke no şer biqedîyo ganî statuyê Rojawanî bêro naskerdene û wina dewam kerd: “Nê 10-15 serrîyo ke Rojawanî de statuyêk ameyo girewtene. Şarê Rojawanî bi nasname bi heme bawerîyan xo ray ra beno. 15 serrî yo uca de şer dewam keno la no model reyna zî uca ra nêvejîya. Nika zî reyna Sûrîye de statuyêko newe yeno ronayene. Ganî no statu zîhnîyetê seserrîn nêbo. Lazim o ke heme şarê ke uca de ciwîyenê xo mîyanê îdareyî de bivînê. Û lazim o ke kurdî xo uca de xo bi xo ray ra bibê. Nê ke şer do seserrna dewam bikero. Seba no şer biqedîyo û aramî bêra Rojheleto mîyanên ma vanê “Rojawanî rê statu, heme şaran rê azadîye.”
‘Eke statuyêk nêdîyo kurdan Rojhelato Mîyanên de rehetîye nêvirazîyena’
Mamosteyê Kirmanckî Nesîp Gultekîn dîyar kerd ke modelo ke Rojawanî de awan bîyo heme merdimîye eşkena tira feyde bivîna û vat: “Rojawanî de 2011î ra yo têkoşînêko gelekî gird est o. Uca de statuyêk girewto destê xo û seba heme şaran eşkenê komelêko winasîn virazê. Bi nê hewayî no komel eşkeno xo weye bikero. Nê semedî ra gelekî muhîm o. Eke no statu bêro naskerdene temamê kurd û merdimîye eşkenê tira feyde bivînê. Ewro ma ewnîyenê eke satatuyêk nêdîyo kurdan Rojheleto Mîyanên de rehetîye nêvirazîyena. Ma ke ney ra bawer kenê birêz Ocalan bi xo serra 1993î ra nata vano ke nê welatî de tirk û kurdî pîya biciwîyê. Wexto ke pîya biciwîyê hem eşkenê hetê erdnîgarîye ra xo weye bikerê hem hetê merdimîye ra eşkenê xo weye bikerê. Bi nê hewayî eşkenê temamê dinya rê bibê nimûne. Wexto ke dewleta Tirkîya de temamê însanê ke ciwîyenê bikerê endamê tirkîya temam la eke ti bikerê endamê tirkan, kurdan yan zî sunnî, elewî o wext asîmîlasyon virazîyeno û mabên de neyartî û hesnêkerdiş virazîyeno.”
‘Xo bi xo çîyêk çareser nêbeno’
Nesîp Gultekîn ard ziwan ke seba ke heme neteweyî na erdnîgarîye ser o bieşkî pîya biciwîyê ganî her kes vengê vejo û wina dewam kerd: “Kurd bi xo neteweyêk ê Rojhelato Mîyanên de hetê dewletan ra parçe bîyê. Wexto ke ma ewnîyenê Qanûno Bingeyîn yê 1921î ra Tirkîya de tirk, kurd û netewê bînî eşkenê pîya biciwîyê. La Qanûno Bingeyîn yê 1924î ra ma biewnîyê no bedilîyayo. O semedî ra nika no yew firsend o. Ma vat 1993î ra yo Birêz Abdullah Ocalan û temamê şarê Kurd naye wazeno. Wa Kurdî Tirkîya de bibê hemwelatîyê seyyewbinî. Ewro ma ewnîyenê serekê partîya MHP’yî zî vat ke kilitê çareserîye Girawa Îmrali de yo. Ma ke naye ra bawer kenê ma vanê, yewbînan çinkerdiş nê pîya hem Tirkîya hem zî şarê Tirkîya bixelesnê û heme netewê ke na erdnîgarîye ser o ciwîyenê xo weye bikerê. Bi nê hewayî ti eşkenî vajî wa û birayîye la wexto ke ti vajî wa kurd û ziwanê kurdan çin bibê o wext no seba tirkîya zî kurdan zî mergêk o. Tena kurd û tirkî nê heme netewê ke na erdnîgarîye ser o ciwîyenê eşkenî sey wa û bira pîya biciwîyê. Wexto ke engiştêk nêra nêkewa mîyan înan, pêro wa û bira yê. Nê semedî ra ma wazenê statuya Rojawanî bêra şinasnayene. Kesê ke nînan wazenê ganî vêş bibê. Xo bi xo çîyêk çareser nêbeno, ganî her kes vengê xo vejo.”
