Raporê serrane yê Sekreterê Pêroyî yê Neteweyanê Yewbîyayeyan ê derheqê heyfgirewtişan de mojneno ke vera pawitoxanê heqanê însanan ê ke bi NY reyde hemkarî kenê, zordestî hem hetê pêroyî ra hem zî hetê metodan ra sewîyeya globale de zêdîyena.
Goreyê raporî, 32 dewletan ra ke nê tewir hedîseyî tede qewmîyenê, 10 hebî bi hewayêko îronîk endamê Konseya Heqanê Însanan a NY’yî yê.
Konseya Heqanê Însanan a NY’yî raporê Sekreterê Pêroyî António Guterresî ke 17ê êlule de weşanîya, ey ser o munaqeşe kerd. Raporî de qeyd bî ke 32 dewletan de vera kesanê ke bi mekanîzmayanê NY’yî reyde xebitîyenê yan zî wazenê bixebitîyê, înan ra heyf yeno girewtene.
Raporî bale anto vera kesanê ke dûrîyê welatê xo ciwîyenê ser o ke zordestîyê teberê sînor înan ser o zêdîyenê. Cagîra Sekreterê Pêroyî ya Berpirsîyara Heqanê Însanan Ilze Brands Kehris îqaz kerd û wina vat: “Tayê kontekstan de kêmîbîyayîşê gazinan yan qet rapornêbîyayîş, nîşaneyê averşîyayîşî nîyo, beno ke îşaretê bêvengkerdiş yan zî cezakerdişan o.”
Madeleine Sinclairî ke Dîrektora ISHR’î (Seba Heqanê Însanan Xizmetê Mîyanneteweyî) ya New Yorkî ya, vat: “Her hedîseya heyfî, vengêko bêvengkerdişî temsîl keno. Wexto ke dewletî kesanê ke bi NY’yî qisey kenê ceza kenê, tena vera ferdî de hêrîş nêkenê, vera sîstemê ke seba pawitişê înan awan bîyo zî hêrîş kenê.”
Rapor mojneno ke metodê neweyî reyde zordestîya vera pawitoxanê heqanê însanan sînorê netewan vîyarena û heta endamê Konseyî zî rastê nê zordestîyan yenê. Rêxistinê heqanê însanan û tayê dewletî, seba vengîya raporî bêra pirkerdene û heyfgirewtişî bêceza nêmanê, vengdayîşê mekanîzmayêko hîna xurt kerd.
