Sirri Sureyya Onder û Pervîn Buldana ke şîyê Îmrali qisey kerd û wina vat “Ma goreyê prosesanê verênan hîna zaf hêvîdar ê.” Îzahatî de ame dîyarkerdene “Ma do serra newîye de sey heyetî îzahatêko hîrayêr bikê.”
Wekîlê Partîya Yewîye û Demokrasîya Şaran (DEM Partî) Sirrî Sureyya Onder û Wekîla Wanî ya DEM Partî Pervîn Buldana ke Hepisxaneyê Tîpa F ya Emnîyetê Berzî yê Girewtî yê Îmrali de Abdullah Ocalanî reyde qisey kerd, derheqê qiseykerdişî de notêko agahdarî vila kerd.
Notê agahdarîyî de wina ame vatene: “Ma seba ke proses hesas o û vernîya ci nêro girewtiş heta demêk ma do seba çapemenîye îzahatêk nêdê. No qerar manaya xo nimitişê çîyan nîyo; eksê ci rêzgirewtişê qiseykerdişanê ke ma do biramê, yew îcab o. La eke ma yew cumle vajê, ma eşkenê vajê ke ma goreyê prosesanê verênan hîna zaf hêvîdar ê. Ma do serra newîye de sey heyetî îzahatêko hîrayêr bikê.”
