Serekê Pêroyî yê CHP’yî Ozgur Ozelî bal ant “Peymana 10ê Adare” ya ke mabênê hukmatê Şamî yê demkî û HSD’yî de virazîya û va: “Wa ereb, kurd û tirkî aştîye de biciwîyê. Rayîrê nê çîyî zî yew qanûno bingeyînî ra vîyareno ke her kes tede ca bigîro. Vengê ke Tirkîya ra vejîyeno, wa na xale de awanker bo.”
Serekê Pêroyî yê CHP’î Ozgur Ozel, qezaya Saruhanliye ya Manîsa de tewrê merasîmê akerdişê xeylê projeyan bi. Ozelî qiseykerdişê xo de averşîyayîşê peyênî yê Sûrîye û wezîfedarîyê Tirkîyaye ser o ercnayîşê avzelî kerdî.
‘Şer feyde nêdano kesî’
Ozgur Ozelî derheqê peymane, mabênê Şam û Hêzanê Sûrîyeya Demokratîke (HSD) de destnîşan kerd ke wa prosesê dîplomasîye nêro astengkerdiş û wina va: “Nêbeno ke ma bikewê mantiqê ‘dem qedîya, wa aştîye nêbo şer bibo’. Ma a bawerîye de yê ke wa warê dîplomasîye bêro herakerdiş. Bêîstîkrarîya Sûrîye feyde nêdana kesî.”
‘Wa Tirkîya, Sûrîye de awanker bo’
Ozelî hêrişê ke vera elewî û durzîyanê Sûrîye de bîyê şermezar kerdî û seba çareserîyêka domdare bal ant qanûnê bingeyînî yê neweyî ser û wina va: “Ma hêrişê vera birayanê xo yê elewî, nusayrî û durzîyan xeylê rey şermezar kerdî. Wa ereb, kurd û tirkî aştîye de biciwîyê. Rayîrê naye zî yew qanûno bingeyîn ra vîyareno ke her kes tede ca bigîro. Vengê ke Tirkîya ra vejîyeno, wa na xale de awanker bo.”
Ozgur Ozelî peynîya qiseykerdişê xo de nê çîyî ardî ziwan: “Eke nê prosesê aştîye de dinya de, Ewropa de yan zî Sûrîye de yew erk bikewo milanê CHP’yî ra, ma amade yê ke paştî bidê. Teyna wa aştîye pê bêra.”
