Serekê CHP’yî yê Pêroyî Ozgur Ozel beyanatê xo de ke derheqê vengdayîşê tarîxî yê Rayberê PKK’yî Abdullah Ocalanî da, hukmatî ra vat ke berpirsîyarî bigîre û bicesaret bibe. Bi vatişê ‘Meseleyê kurdî çin o‘ meseleyê kurdî nêyeno çareserkerdene.”
Serekê CHP’yî yê Pêroyî Ozgur Ozel zîyaretê xo yê Serekê Partîya Refahî yê Pêroyî yê Fatîh Erbakanî de derheqê vengdayîşê “aşitî û komelê demokratîkî” yê 27ê sibate yê Rayberê PKK’yî Abdullah Ocalanî de beyanat da.
Ozelî dîyar kerd ke meseleyê kurdî bi vatişê Erdogan ê “Meseleyê kurdî çin o” çareser nêbeno û wina vat: “Seba çareserîya nê meseleyî parlamento de xebatêka ke tede tu partîyî teberê ci de nêmanenê û komela sivîle û heme qismê komelî temsîl benê, şert a. Ganî no teqez bêro kerdene. Sere û peynîya na xebate zî demokratîkbîyayîş o. Hemwelatîyê Tirkîya çi yo çi nîyo. Ez rast nêvînena ke partîya îqtîdarî û serekkomarê nê welatî serra 2025î de henekê o bi aqilê şarî bikero. Eke ti karêkî kenê o wext ganî ti berpirsîyarîya ê karî zî bigîrê û caseretê xo zî bimojnê. Şarî nê wezîfeyê dato to.”
Ozelî dîyar kerd ke seba proseso newe wezîfeyanê xo nêremeno û vera bêvengîya Erdoganî wina reaksîyon mojna: “Pozîsyonê aktoran dîyar o. La qaşo pozîsyonê kesêkî zelal nîyo. Heme çîyî zano la wexto ke hesabê ey nêro xo ker û lal keno. Edî lazimî bi zerrîbîyayîşî est o. Her kes zano ke kamcîn hetê nê prosesî de ca gênê. Ti tam merkezê ci de yê. Ganî şima zerrî ra bibê, zelal bibê. Wa kes kesî nêxapêno. Ganî Recep Tayyîp Erdogan sey tersonekan barê heme talukeyan nêkero milê şîrikê xo û bikewo menfatanê xo yê sîyasîyan dima. Wa zelal bo, bicesaret bibo.
Eke seba welatê ma bixeyr bo, eke gonî nêrijîya, eke riyê şarî bihuyo, dayîkî nêbermê, eke aştî yena, eke êdî kurdî problemanê xo ra xelisiyenê, eke ê xo sey hemwelatîyanê seypê û yê nê welatî his bikerê, ma amade yê.”
