Serekê EHP’yî Hakan Ozturk ard ziwan ke ganî berpirsîyarîya vatişî babetanê meseleyê Kurdî, aştî û wa û birayîye sosyalîstî bigîrê xo ser o.
Serekê Partîya Şaranê Bindestan Hakan Ozturk dîyar kerd ke sosyalîstî seba prosesî amade nîyê, ganî no mesele wina peygoş nêkerê, ganî bikewê qada problemî û tîya ra berpirsîyarî bigîrê, xora goreyê prensîbanê sosyalîzmî ganî wina bibo.
Serekê Partîya Şaranê Bindestan Hakan Ozturk derheqê vengdayîşê Rayberê Şarê Kurd yê ‘Komela Aştî û Demokratîke’ de Ajansê ANF’yî rê qisey kerd. Hakan Ozturk wina vat: “Vengdayîşê Ocalanî netîce de ronayîşê çekan, aştî, komela demoratîk û vengdayîşê sîyasetî yo. Derheqê meseleyê kurdî de tewrê heme çîyan ke ameyê vînayene ganî çîyêko winasîn bibîyêne û bî. Ganî no sey çîyêko pozîtîf bêro vînayene. Seba çareserkerdişê meseleyê kurdî zanayîşêko xurt est o.
Feydeyê prosesê çareserî yo verên
Ozturk waşt ke prosesê çareserî yo verênî de vindertişê rişîyayîşê gonî tena bi sereyê xo zî ganî pozîtîf bêro vînayene û wina vat: “Rewşa de ke prosesî awan kerda ma vînenê ke şuxilnayîşê Kurdkî tayî destkewteyî est ê. Nê reyde xoverdayîşê Gezî, rêxinbîyayîşê HDP’yî û se ra 13 rayî, qelsbîyayîşê tena bi sereyê xo vîraştişê hukmatî yê AKP’yî reyna eynî wextî de bî. Çend zor bêro dayene zî, rayîr çend bêro tengkerdene zî netîce do binî ra nêbedilîyo. Proseso ewroyîne de do eyn çîyê bêrê vînayene. Waştişê demokrasîyî zorê astengkerdişî ra xurtêr o.”
Amadekerdişê şarê tirkî seba aştî
Ozturk ard ziwan ke mumkin o ke şaro tirk seba aştî amade bibo û wina dewam ked: “Komele bi desan serrî yo ke propagandayêka şovene reyde rî bi rî yo. Nenûgê kesî bigino kerrayêk ê kesan berpirsîyar vînenê ke xoverdayîşê heqî kenê. Nê semedî ra karî rehet nîyê. Heme demanê xoverdayîşî de wa û birayîya şaran her tim corî de tepişîyaye. Demanê vernîya ma de no do îmkanêko gird bimojno ma. Komela ma zaf çîyî tecrube kerdê. Bi saya nê tecrubeyan do vernîya xo bivîna. Destpêkerdiş nêmeyê qedînayîşî yo. Ma dest pêkerd.”
Sosyalîstî zî seba nê prosesî amade nîyê
Ozturk vat ke partîyê sosyalîstî ke Tirkîya de yê ê zî seba prosesî amade nîyê la eşkenê amade bibê û wina dewam kerd: “Berpirsîyarîya vatişê meseleyê kurdî, aştî û wa û birayîye her tim kewt para sosyalîstanê kurdan. Barê na berpirsîyarîye ganî sewbîna kesî zî bigîrê. Nimûneyê zaf baş est bî ke nê meseleyî ardî ziwan. Sey netîce ganî no mesele bi tarzêk bêro vatene ke bireso heme komelan.”
Ganî zen nêkerê ke no mesele peygoş bikerê
Karo ewilîn ke ganî sosyalîstî bikerê zen nêkerê ke no mesele peygoş bikerê. Ganî berpirsîyarîya qada xo qiseykerdişê nê meseleyî qebul bikerê. Prensîbê sosyalîzmî yê derheqê meseleyê netewan de no yo xora. Problemo netewî tena Rusya de nê welatê ma de zî est o. Lenîn xoverdayîşêko tena asta sendîkalîstî de bibo, rexne keno. Maddeyêko tewr muhîm yê demokrasîyî problemê azadîya netewan o. Ganî ma perspektîfê xo goreyê nê awan bikerê. Hetê tarzî de ganî çep, babeta vatişê meseleyê kurdî de hetê tarix û cayî ra pêveronayîş bêrê berardene; ganî giranî bidîya referansanê teberî; ganî seba çareserî peşnîyazanê şênber, aktuelan ser o bêro qiseykerdene ”
