Bi pêşengîya MEBYA-DER’î 16 kesê ke têkoşînê azadîya şarê kurdî de cuya xo vîndî kerdbî, dewa Bîra Zeynî ya qezaya Pasûrî de ameyê yadkerdene.
Komela Yewî Kultur Piştgirî û Hetkarîya Keyeyanê ke Merdimê xo Derguşê Şaristanîye de Vîndî Kerdî (MEBYA-DER) qezaya Pasûrî ya Amedî de 16 endamê Têgêrayîşê Azadîye yê ke tarîx û demanê cîya de cuya xo vîndî kerdbî, dewa Bîra Zeynî de yad kerdê.
Endam û rayberê MEBYA-DER, DEM Partî, DBP, TJA, Dayîkê Aştî, Komela 78an, TUAY-DER, Hemşaredarê qeza û xeylê kesî beşdarê yadkerdişî bîyê. Cayê yadkerdişî de mumî ameyê wekerdene û qerenfîlî ronayê masa ser o. Girse ewil seba kesanê ke têkoşînê azadîye de cuya xo vîndî kerda, deqeyêk rêz girewt dima ra sloganê “Şehîd namirin” vat. Programê yadkerdişî de slogan û rêzgirewtişî ra pey dua û fatîhayî ameyê wendene.
Yadkerdişî de mewlid ame wendene. Dimayê wendişê mewlidî sînevîzyon ame mojnayene. Sewbîna keyeyan nameyê Zeynel Bayramî ser o parka bi nameyê “Warê Tutan ê Zeynel Bayramî” seba gedeyan akerd.
‘Ma bi şehîdanê xo sereberz ê’
Hemsereka MEBYA-DERa Amedî Gurbet Sevîktek yadkerdişî de qisey kerd û wina vat: “Ma înan bi rêzdarî anê xo vîr û beşna xo hemverê înan de tewnenê. Sereyê keyeyanê ma û Rayberê Şaran birêz Abdullah Ocalanî weş bo. Ma heme bi mîrasê nê têkoşînê girdî pîl bîyê. Ma bi şehîdanê xo sereberz ê û ma do her tim wayîrê şehîdanê xo vejîyê û xover bidê.”
Nameyê 16 endamanê Têgêrayîşê Azadîye ke seba înan programê yadkerdişî ame viraştene, wina yê:
“Alladîn (Hîkmî Yildenîz), Çiya (Mekî Bayram), Servet Bayram, Şîrîn Bayram (Kujer nediyar), Evrîm Andok (Azîze Bayram), Rodî Piling (Abîdîn Bayram ), Devrîm Amed (Hêvîdar Turk), Rêber Andok (Mehmetşah Yildenîz), Evrîm Amed (Ayşe Bayram), Alladîn Amed (Serhat Bayram), Şemsettîn Bayram (Bi mayîna dewletê), Mahsûn Bayram (Bi mayîna dewletê), Sînan (Şakîr Bayram), Pîro Amed (Şebap Bayram) Dilzar Rêber Andok (Rojbîn Sonmez) û Laşer Lîs (Zeynel Bayram).”
