Yeno zanayene ke pêvînayîşê nukleerî ser o yê mabênê DYA û Îranî de 6ê sibate do paytextê Umman Maskatî de bêrê kerdene.
Ame dîyarkerdene ke pêvînayîşî waştişê Tehranî ser o Stenbol de nê Maskat de bêrê kerdene û rayberîya Trumpî zî nê pêşnîyazî qebul kerdo.
Goreyê çapemenîya mîyanneteweyî yeno pawitene ke pêvînayîşî de temsîlkaro taybet ê DYA’yî Steve Witkoff û Wezîrê Karanê Teberî yê Îranî Abas Arakçî bêrê têhet.
Hetê Îranî wazeno dayîşûgirewtişî bi formatê dihetî bêrê kerdene û tena dosyaya nukleerî ser o bê. Tehran nêwazeno programê fuzeyî yo balîstîk û piştgirîya grûbanê hemkar ê herême reyde bêra erjnayene. DYA zî wazeno pêvînayîş hîna bo.
Çimeyê herême vanê, tercîhê Ummanî rastameyîş nîyo, Maskat sey kanalêkê cayê bawerî yeno vînayene ke demêko derg o mabênê Washington û Tehran de mabênkarî keno. Ney ra ver paytextanê welatanê cîya yê Ewropa û Rojhelatê Mîyanênî de pêvînayîşî ameybî kerdene labelê pêameyîşêko şênber nêbibi.
Pêvînayîş do binê sîya kaoso vêş ê herême de bêro kerdene. Artêşê Dewletanê Yewbîyayeyan ê Amerîkayî (DYA) eşkera kerd ke teyareyêka bêmerdim a tîpê Shahed-139 a Îranî Deryaya Ummanî roja sêşeme ke xo nêzdîyê keştîya teyareyan a nukleerî USS Abraham Lincoln kerdbî, ameye eştene.
Serekê DYA’yî Donald Trumpî hişyarî daye ke eke pêameyîşêk nêbo do çîyê nebaşî bibê.
