Heyetê DEM Partî yo ke Îmrali de Rayberê PKK’yî Abdullah Ocalanî reyde pêvînayîş kerdo, ewro do partîyanê sîyasîyan reyde pêvînayîşanê xo bidomnê. Pêvînayîşê AK Partî de Serekkomar Erdogan do çin bo.
Pêvînayîşê Îmrali yê heyetê DEM Partî û mesajanê Rayberê PKK’yî Abdullah Ocalanî ra pey proseso derheqê Meseleyê Kurdî de dewam keno.
Wekîlê DEM Partî Pervîn Buldan û Sirrî Sureyya Onderî ke şîbî pêvînayîşê Ocalanî û Serekê Şaredarîya Mêrdînî ya Şaristanê Girdî yo ke cayê ci de qeyyum ronîyayo Ahmet Turkî ke yeno vatene ke do pêvînayîşanê dima de beşdar bibo, 2ê çele de Serekê TBMM’î Numan Kurtulmuş û Serekê Pêroyî yê MHP’î Dewlet Bahçelî zîyaret kerd. Heyetê DEM Partî do hewteyê neweyî de zî pêvînayîşanê xo dewam bikero.
Heyet do ewro saete 11.00’î de Merkezê Pêroyî yê Gelecek Partî de Serekê Pêroyî yê Gelecek Partî Ahmet Davutogluyî zîyaret bikero. Saete 13.30î de Meclîsê Girdî yê Neteweyî yê Tirkîya de Cagirserekê Pêroyî yê AK Partî Efkan Ala, Hetkarê Serekê Pêroyî û Qiseykerdoxê Partî Omer Çelîk, Serekê Grûbe Abdullah Guler û rayberanê bînan yê partî reyde do pêvînayîş bikero. Pêvînayîşî de Serekê Pêroyî yê AK Partî û Serekkomar Recep Tayyîp Erdogan do çin bo. Cayê bînî yê heyetî do Merkezê Pêroyî yê Partîya Saadetî bo. Heyet do saete 15.30î de Serekê Pêroyî yê Partîya Saadetî Mahmut Arikan reyde bêro têhet.
Heyet do meşte (7ê çele, sêşeme) Serekê Pêroyî yê DEVA Partî Alî Babacan û Serekê Pêroyî yê Partîya Yenîden Refahî Fatîh Erbakan reyde bêro têhet.
CHP: Ma do bierjnê
Pawîyayêne ke heyetê Îmrali no hefte Serekê Pêroyî yê CHP’î Ozgur Ozelî reyde zî bêro têhet. La tarîxê pêvînayîşî hema dîyar nêbîyo. Ozelî va ke ê do waştişê pêvînayîşî MYK’yî bierjnê û wina îzahat da: “Ma no mesele embazanê xo reyde bi hewayêko hîra erjnenê. Ez verê ke kombîyayîşê MYK biqedîyo nêeşkena çîyêko winasî vaja. Ma do embazanê xo reyde bierjnê ke do pêvînayîşêko winasî bibo yan nêbo, eke bibo do senî bo û eke serekê pêroyî yê yew partî nê pêvînayîşî nêkero do senî tesîr biko.”
Serekê Pêroyî yê ÎYÎ Partî Musavat Dervîşogluyî va “Ma qet heyetanê înan reyde muhatab nêbenê.” û vernîya pêvînayîşan girewte.
