Yeno pawitene ke Heyetê Îmrali yê Partîya Têduştî û Demokrasî ya Şaran (DEM Partî) û Serekkomar Recep Tayyîb Erdogan 28ê teşrîna verêne de kom bibê. Melumatê derheqê ca û saetê pêvînayîşî de hema nêameyê parekerdiş.
Serekwekîla Grûbe ya DEM Partî Gulîstane Kiliç Koçyîgît bernameyê ÎlkeTVyî de teqez kerd ke mabênê di hetan de pêvînayîşêk est o ke bi program yeno kerdene. Koçyîgîte vat: “Hem Heyetê Îmraliyî ma hem zî ofîsê çapemenîye yê Serekkomarîye derheqê naye de eşkerayî bido na hîna raşt beno, labelê programêk ser o yeno xebitîyayene.”
Verê zî di pêvînayîş ameybî kerdene
Heyetê Îmraliyî yê DEM Partî û Serokkomar Erdogan verê naye zî di rey pêvînaybî. Pêvînayîşo yewin 10ê çeleyî de Kûllîyeya Serekkomarîye de ameybî û heyetî Pervîne Buldan û Sirri Sureyya Onder yo rehmetî est bîyî. Pêvînayîşo dîyin 7ê temmuze de reyna Kûllîyeya Serekkomarîye de ameybî kerdene û nê pêvînayîşî de Pervîn Buldan û Mîthat Sancar est bî. Pêvînayîşî de Serekwekîlê Pêroyî yê AKP’yî Efkan Ala û Serekê MÎT’î Îbrahîm Kalin zî est bîyî.
