Suleyman Encu ke domanê xo Cemal Encu Qirkerdişê Roboskî ameybî qetilkerdiş, dîyar kerd ke peynî domanê xo fek cerdevanîye verada û vat: “Dewlete no qirkerdiş kerd. Ma hetanî peynî doza xo edeletî veranêdanê.”
Dewa Roboskî ya qezaya Qileban a Şirnexî de, 28ê Kanûna 2011î de verba 34 welatijanê Kurdan Artêşa Tirkîya no qirkerdiş viraşt. 19 doman û 34 welatijê Kurd netîceyê bombebaranî de mabênê dewa Roboskî û sînorê Kurdistanê Başûrî de ameyê kiştiş.
Ser qirkerdişî ra 13 serrî vîyartî la nê 13 serran de kiştoxê qirkerdişî nêameyê cezakerdiş û cipersayişî ke derheqê qirkerdişî de ameybî destpêkerdiş zî tu netîce nêameyê girewtiş. Înan ra yew ke domanê xo qirkerdişê Roboskî de ame qetilkerdiş Cemal Encu bî. Cemal Encu 17 serre bî û seba debara keyeyî bikero derbasî Kurdistanê Başûrî bibî ke uca ra çay û şekir bîyaro. Na roje Cemal Encu û 34 merdimê ci derbasî sînor bîyê la raştî hêrişê teyyareyê şerî ameyî. Hêriş de ame kiştiş. Pîyê Cemal Encu, Suleyman Encu ke verê qetilkerdişê domanê xo cerdevanî kerdî peynîya qikerdişî êdî fek cerdevanîye verada û seba qetilê domanê ey bêrê cezakerdiş pey doza edeletî de yo.
Tirkîya de edelet çîn o
Suleyman Encuyî ard ziwan ke qirkerdiş de tevî lajê ey 34 merdimê ci cuya xo dayê û wina vat: “Domanê mi û 4 birazê mi qirkerdiş de cuya xo dayê. 13 serre qirkerdişî ra vîyart. Ma wazenê edelet pê bêro. Kesê ke no qirkerdiş viraştî wa bêrê cezakerdiş. Çi heyfo ke Tirkîya de edelet çîn o.”
Ma heta peynî xover bidê
Dewamîya qiseyanê xo de Encuyî bal ant ser vatişê ke Artêşa Tirkîya sivîlan nêkişeno û wina qedîna: “Roboskî de lejkeran no qirkerdiş nêkerdo, kamî kerdo? Dewlete no qirkerdiş kerd. Nê teyyareyê Amerîka û Rusya bîyê. Teyyareyê Tirkîya bîyê. Ma bêçare bîyê cerdevan. Ma bi zerrîya xo nêbîyê cerdevan. Peynîya qirkerdişî mi va çi kenê wabikê ez do çekê înan nêhawano û mi çekê înan verada. Mi fek cerdevanîye verada. Tena waştişê ma edelet pê bêro, peynîya nê qirkerdişan bêro.”
