Cigêrayîşê edaletî yê keyeyanê Roboskî 13 serrî yo dewam keno.
Dewa Roboskî ya qezaya Qilabanî ya Şirnexî de 28ê kanûna 2011î de netîceya bombardumanê teyarayanê şerî yê artêşa tirke de 19ê ci domanî 34 kesî ameyî qetilkerdene. Qirkerdişê Roboskî 13 serrî xo pey de verdayî la edalet nêame caardene. Selahîyetdaranê dewleta tirke û hukmatî qirkerdiş sey ‘operasyonêkê qezayî’ mojna.
Keyeyanê Roboskî yê ke serê goran de merdimê xo yad kerdî, qisey kerd.
Fatma Encu: 13 serrî yo 34 merdimî ameyî qetilkerdene. Mîyanê nê serran de edalet nêame. Mêrdeyê mi destî ra şi, domanê mi sêwir mendî. Ne tehqîqat ame kerdene ne zî kiştoxî ameyî muhakemekerdene. Dewlete seba eşkerakerdişê kiştoxan gamêke zî nêeşte.
Îbrahîm Encu: 34 merdimanê ma verê xo dabi Iraqî. Merdimê ma seba debatî şîbî serê sînor, leşkeran zî no zanayêne. Nêmeyê şewe bi teyarayan merdimê ma ameyî qetilkerdene. Ma tena edaletî wazenê. Rixmo ke hendê serrî vîyartî edalet nêame Roboskî.
Mîran Encu: Nêmeyê şewe bi teyarayan domanê ma ameyî parçekerdene. Rixmo ke hendê serrî derbaz bîyî kiştoxê domananê ma nêameyî eşkerakerdene. Destê ma ra çîyêk nêno. Sey keyeyanê înan ma tena edaletî wazenî. Cigêrayîşê ma yê seba edaletî dewam keno. Ma do qetilkeran eşkera bikerê.
Abdurrahman Encu: Qirkerdişî 13 serrî xo pey de verdayî. Dej û hêsirê çimanê ma mendî. Êyê qetilkerî nêameyî vetene verê ma. Ma edaletî wazenê. Na dewlete ma rê edalet nêard. Ma kiştoxan hewaleyê Homayî kenê. Ê do hesab bidê ma. Dewlete sozo ke da ma nêard ca.
Çime:ANF
