Komîteya Rayberê ya PKK’yî dîyar kerd ke seba vengdayîşê Rayberê PKK’yî Abdullah Ocalanî yê ‘Vengdayîşê Aştî û Kolema Demokratîke’ bi ca bêro, ma ewro ra pey adirbestî îlan kenê.
Tedeyîya beyanatê Komîteya Rayberîya PKK’yî derheqê vengdayîşê Rayberê PKK’yî Abdullah Ocalanî ya bi sernameyê “Şarê ma yo Welatparêz û Raya Pêroyî rê” wina ya:
“Beyanatê Rayber Abdullah Ocalanî ya 27ê sibate yê bi sernameyê “Vengdayîşê Aştî û Komela Demokratîke” rayîrê heme hêzê azadîye û demokrasî roşnî keno û sey Manîfestoyê Serdemî yo. Seba ke şarê ma û merdimîye manîfestoyê komela demokratîke vêş kerda, ma bi rêzdarî Rayber Apoyî silam kenê.
Ma vengdayîşî qebul kenê û goreyê ci têgêrenê
Bi nê Vengdayîşî Kurdîstan û Rojhelatê Mîyanênî de do verê prosesêkê tarîxî bêro akerdene. No do pêro dinya û cuya azade û averberdişê îdareyê demokratîkî ser o tesîro gird bikero. Na çarçewe de berpirsîyarîye yê ma perûn a; her kes ganî wayîrê berpirsîyarîye û wezîfeyê xo bivejîyo û bîyaro ca.
Bêşik kerdişê Vengdayîşê winayênî wayîrê muhîmîya tarîxî yo; nika seba ke muhtewaya ci bi serkewtişî pratîk de bêro caardene no zî wina muhîm o. Ma sey PKK’î muhtewaya nê vengdayîşî yo ke qala ci yena kerdene qebul kenê û vanê ke ma do cepheyê xo ra goreyê vengdayîşî têbigêrê û bîyarê ca. La semedê serkewtişî ganî zemînê sîyasetê demokratîkî û huqûq zî bêro pêardene.
PKK hêzê rayraberdişê têkoşînî dano şarê ma
Zaf eşkeraya yo ke PKK nêm seserra peyêne de Kurdîstan de bî têgêrayîşê qehremanîye û heqîqetî. Her çî bi têkoşînêkê cesur û fedakarî, bedel û kede ame qezenckerdene. Ma heme şehîdanê qehremanan ê nê têkoşînê azadîye yê girdî bi hurmet, heskerdiş û minetî yad kenê. Nika bi eynî ruh û bawerî ma nê destkewteyanê tarîxîyan kirişenê prosesêko newe yê têkoşînî. Zanayîşo ke Rayber Apoyî da û têkoşîno girdo ke PKK’yî afirna hêz dano şarê ma ke têkoşînê azadîye bi sîyasetê demokratîkî rayra bero.
Ma ewro ra pey adirbest îlan kenê
Na çarçewe de seba ke ma verê Vengdayîşê Haştîye û Komelê Demokratîkî yê Rayber Apoyî abikerê, ma ewro ra pey adirbest îlan kenê. Heta ke hêrişê ci nêbo qet hêzêkê ma do çalakîya çekdar nêkero. Naye ra wêter semedê caardişê xusûsê sey çeke ronayîşî têna bi serkêşîya pratîke ya Rayber Apoyî de beno.
Ganî Kongre hetê Rayber Apoyî ra bêro kerdene
Hetê bînî ra ma hazirê ke sey waştişê Rayber Apoyî kongre kom bikerê. La seba ke no bêro caardene ganî waro biasayîş bêro pêardene û semedê serkewtişê kongre Rayber Apo bi xo kongre rayra beno. Heta nika îdareyê şerî, pîya bi heme xeta û kêmaneyan ma rayra berd; la îdareyê Demê Haştîye û Komelê Demokratîkî tena Rayber Apo eşkeno rayra bêro.
Ganî şertê Rayber Apoyî bêrê bedilnayene
Raştîyê zaf eşkera ramojnenê, semedê serkewtişê Vengdayîşê Haştîye û Komelê Demokratîkî, çarçewaya çareserîya demokratîke ya meseleya kurdî de demokratîkbîyayîşê Tirkîya û Rojhelatê Mîyanênî û averberdişê têgêrayîşê demokrasîyî yê globalî, ganî şertê berê bedilnayene ke Rayber Abdullah Ocalan eşkeno bi fîzîkî azad bixebito û embazê ci zî tede her kesî de bêastengkerdişî têkîlî rono. Ma hêvî kenê dezgehê eleqedarî yê dewlete nînan anê ca.
Vengdayîş destpêkerdoşo newe yo
Şarê ma û dostê ma yê erjîyayeyî!
Vengdayîşo ke Rayber Apoyî kerd bi qetî yew peynî nîyo, eqsê ci de destpêkerdişêko newe yo. Senî ke eşkerayîye de zî yeno vînayene pêroyî de 35 serranê peyênan de, taybet 20 serranê peyênan de çîyê ke ganî ma bikerdêne û wextê ci de ma tam nêkerdî nika bi hewayêkê zaf zelal û tûjî îfade keno ke ganî bêrê kerdene. Nê hetî ra ganî sebebê vengdayîşê Rayberîye û wezîfeyê prosesî yo ke newe da destpêkerdene raşt bêrê famkerdene û bi serkewtişî bêrê caardene. Zaf muhîmo ke her kes her warî de berpirsîyarîya xo bîyaro ca.
Ma xo vîra mekerê, Rayber Apo tim baro giran girewt xo ser û rayîrê ma roşn kerd û ma rê serkêşîye kerde. Nika bi ‘Vengdayîşê Haştîye û Komelê Demokratîkî’ gamêka newe erzeno û sere de cinî û ciwanî semedê heme bindestan prosesê neweyî dano desptêkerdene. Ma vera her qeyde xîle û hêrişan tim hazir bê, prosesê nêwî raşt fam bikerê û wezîfeyanê xo bi serkewtişî bîyarê ca. Ma her cayê dinya de têkoşînê azadîye xurt bikerê û semedê serkewtişê Vengdayîşê Rayberîye berpirsîyarîya xo bîyarê ca.
Wa Biciwîyo Serkêşo Qehreman ê Şarê ma PKK!
Bijî Rêber APO!”
