Polîsanê ke eşt Keyeyê Hunerî yê Jîn Artî ser o kamerayê ewleyîye qefilnayî û texteya kursî ser o alaya Tirkî xêz kerd.
Polîsan şafeqî Îzmîr de eşt zaf keyeyan û Keyeyê Hunerî yê Jîn Artî ser o. Polîsan wextê sereştişî de berê Keyeyê Hunerî şikito, kabloyê kamerayê ewleyîye birnayî û kamera girewta. Cigêrayîşê dezgeyî bê zanayîşê rayedaran ame kerdene. Polîsan dest da xeylê kitab, kovar û komputeran ser o. Cigêrayîşê sazgehî de polîsan zerar da tayê beran û texteya kursî ser o zî alaya Tirkî xêz kerd.
Badê cigêrayîşî, vera Keyeyê Hunerî yê Jîn Artî beyanat ame dayene. Mudira Keyeyê Hunerî yê Jîn Artî Belkisa Suleymanoglu dîyar kerd ke seba cigêrayîşî înan rê malûmat nêameyo dayene û wina va: “Bê ke sebebêk bimojnê kewtê zereyê dezgeyî. Ma naye qebul nêkenê û şermezar kenê. Texteya kursî ser o alaya Tirkî xêz kerd. Demanê peyênan de zaf bêhuqûqîyî yenê kerdene. No cigêrayîş zî nînan ra yew o .”
‘Polîtîkayê nêşinasnayîşê nasnameyê kurdan dewam kenê’
Parlamenterê DEM Partî yê Agirî Heval Bozdag zî dîyar kerd ke her roje yew bêhuqûqîya newa reyde hişyar benê û wina va: “Nê polîtîkayê zextî yê îqtîdarî bi serran o ke dewam kenê. Wextêk de ke qalê aştî bena îqtîdarê AKP’yî dano hîskerdene ke do zextê xo yê komelî ser o dewam bikero. Ma wazenê ke welatêko demokratîk de bi nasnameyê xo û bi rûmet biciwîyê. Tîya de ziwan û kulturê kurdî ser o xebatî yenê kerdene. Waştişê şarê kurdî o yo ke bi nasnameyê xo biciwîyê. Eke tehemulê nê xebatanê tîyayî nêkerê, a game do aştî kamcîn bingeyî ser o awan bikerê. Polîtîkaya îqtîdarî ya nêşinasnayîşê nasnameyê kurdan dewam kena. Zemînê aştî bi nê polîtîkayan awan nêbeno. Ma nê hêrişan û polîtîkayan şermezar kenê û ma do têkoşînê xo bidomnê.”
