Serekê verên ê rêxistina AKP’yî yê Amedî Muhammed Akar dîyar kerd ke perspektîfê Îmraliyî de seba heme piroblemanê rojhelatê mîyanênî çareserîyêk est a û ganî Tirkîya, Sûrîye, Iraq û Îran de modelê Rojavayî esas bigîrê.
Muhammed Akar serekê verên ê rêxistina AKP’yî yê Amedî Ajansê Welatî rê derheqê prosesê Aştî û Komelê Dmeokratîkî de qisey kerd. Muhammed Akar dîyar kerd ke prosesê xofesihkerdiş û îmhakerdişê PKK’yî tena Tirkîya de nê, eynê wextî heme welatanê herême de bi baldarî ame taqîbkerdene û vat: “Mendebîyayîşê prosesî bi gamanê ke ameyoxî de bêrê eştene, înan reyde girêdayeyo. Kurdan perspektîfêko newe, perspektîfêko rasyonel û aqilane pêşkêşî Tirkîya kerd. Kurdî wazenê sîstemêko demokratîk bêro awankerdene û o zî mîyanê nê sîstemê demokratîk de cayê xo bigîrê. Îradeyê kurdan îradeyê çareserî yo. No îrade PKK de zî est o, Îmrali de zî, sîyasetê kurdan de zî est o. Ewro lazim o parlamento de reformî bêrê kerdene.”
Prosesê Çareserî yê 2013 û 2015î şaranê Tirkîya de hêvîyê pîlî viraştbî labelê weçînitişanê 7ê hezîrane ra pey AKP’yî nê prosesî orte ra hewana. Muhammed Akar binkewtişê prosesê 2013 û 15î Ergenekon û Cematê Fettullahî ra girê dano. Reyna Muhammed Akarî proseso newe de rol û mîsyonê Abdullah Ocalanî muhîm vîneno û nê semedî ra hêvîyê ey xurt ê.
“Nameyê kurd ganî anayasa de est bo’
Muhammed Akarî da zanayene ke ewro her kes kurdan nas keno la lazim o kurdî qanûn û anayasayan de zî bêro naskerdene û wina dewam kerd: “Lazim o Tirkîya de anayasayêka sîvîl, demokratîk û zafrengî bêra amadekerdene û kurdî zî na anayasa de bi kulturê zo, ziwanê xo, bi nasnameyê xo ca bigîrê. Ziwanê Kurdkî ganî bibo ziwano fermî û ziwanê perwerdeyî. Lazim o dewlete êdî kurdan ra nêtersa, rastî de dewlete û sîyasetmedaran no ters eşto zereyê şarê Tirkîya. Nika zî her roje îftîrayan erzenê kurdan ser o. Kurdan seke binê emrê Îsraîl, Amerîka û NATO’yî de nîşan danê. Çîyêko winasîn çin o, kurdî binê emrê kesî de nîyê. Kurdî bi hezar serrî yo Kurdîstan de yê. Ê aşiqê azadîya xo yê. Sereyê kesî ver de nêronayo.”
“Seba merdimîye şorişêk o’
Muhammed Akarî dîyar kerd ke ewro çareserîyêka demokratîke bêra ca do seba Rojhelatê Mîyanên zî bibo modelêk, seba ney zî perspektîfê Îmraliyî muhîm o û wina vat: “Perspektîfê Îmraliyî de dişmenî çin a, şer çin o. Çi est o; sîstemêko demokratîk û ekolojîk de pîya ciwîyayîş est o. No perspektîf zaf muhîm o. Seba merdimîye şorişêk o. No zî encamê keda kurdan o. Na keda kurdan aştî seba na cografya kerda lazimtî.”
“Modelê Rojava seba Tirkîya firsend o’
Muhammed Akar îfade kerd ke şarê kurdî xeylê zanyar o, qedîm o, perspektîfê înan perspektîfêko demokratîk o û vat: “Şam de perspektîfêko demokratîk çin o. Mezheb yan zî dîn ser o têgêrenê. La Rojavayê Kurdîstanî de sîstemêko demokratîk awan bîyo. Uca de her şar, her bawerî, her mezheb, her sinif; cinî û camêrd pîya, seypê ciwîyenê. No zî modelêk o, ganî Tirkîya qîmetê nê modelî bizana. No seba Tirkîya firsendêk o.”
