Meletîya ke semedê erdlerzî zirarêk pîl dîbî, her çend 2 serrî vîyartî zî bi taybetî meseleyê keyeyan de xeylêk problemî dewam kenê û semedo ke xirbî bi hawayêko baş nêameyî wedaritiş problemê weşîye est ê.
Serê erdlerzê ke 6ê sibata 2023î de merkezê ci Mereş bi ame û 11 bajaran rê tesîr kerd, 2 serrî derbaz bîyê. La hema zî problemê mexdûranê erdlerzî nêameyê çareserkerdiş. Goreyê dayeyanê fermî, cayo ke tewr zaf têsîrê erdlerzî de mendo Meletî yo. Hezar û 237 kesan dinyaya xo bedilnaye û 6 hezar û 444 kesî zî birîndar bîyî. Erdlerzo de ke bi hezaran awanî û kargehî rijyayî 35 hezar û 891 awanî xeripîyayê. Heto bîn ra bi hezaran kesê ke semedê erdlerzî mecbûr mendî ke şaristanê konteyneran de biciwîyê, semedo ke keyeyê înan nêameyê teslîmkerdiş, pêwa ke 2 serrî erdlerzî ser o derbaz bîyê hema zî têkoşînê cuye danê.
Şaristanî de heta nika wareyê weşîye de tedbîrê lazim ê nêameyî girewtiş. Doktorî dîyar kenê ke semedê lêşînîya hewayî nêweşîyê sîneyî zêde benê. Derheqê babete de Hemsereka Sendîkayê Kedkarê Weşîye (SES) ya Şubeyê Meletî Cansu Can û cinîyê mexdûrê erdlerzî Ajansê JINNEWS’î rê qisey kerd.
Zêdebîyayîşê nêweşîyê kronîkî
Hemsereka Şubeyê SES’î ya Meletî Cansu Can dîyar kerd ke 2 serrî yo ke tu başbîyayîşêk nêvirazîya yo û vat: “Semedê erdlerzî xeylêk xebatkarê weşîye mecbûr mendê ke Meletî terk bikerê. Hûmara kêmî ya xebatkaranê weşîye, têsîrê negatîf şarî rê resnayîşê weşîye zî kerd. Sey nimûne; merdimî eşkenê aşmêk badê cû randevûyêk semedê MRI bigîrê. Rijnayîş û wedaritişê xirban bi hawayêk bêqanûnî yeno kerdiş û benê sebebê lêşînî yê hewayî. Çîyo ke ma weçînê, girêdayeyê ma yo. Semedo ke hema xeylêk kesî konteyneran de manenê, nêweşîyê epîdemîkî zî zêde benê. Nêweşîyê qeseba de se ra 85 zêdebîyayîş est o. Nêweşîyê kronîkî çar qat zêde bîyê. Nînan ra vete, hûmara kesê ke muracatê beşê sîneyî zî kenê, roj bi roje zêde benê.”
‘Doganşehir nêame tamîrkerdiş’
Medîne Dogan ke erdlerzî ra xelisîyaybî, dîyar kerd ke pêwa 2 serrî erdlerzî ser o derbaz bîyo zî hema zî konteyner de manenê û wina vat: “Ez bi şert û mercanê xo semedê xebate şina Meletî. Semedo ke Doganşehîr hema zî problemê ci nêameyê çareserkerdiş. Badê erdlerzî ma sey keye vila bî û her yew mecbûr mend ke şêro cayêk. Ez mecbûr menda ke şêra Meletî. Ez wextê şîyayîşî de xeylêk zehmetî ancena. Ma nêeşkenê konteynerî de cuya xo bidomnê. Tena pereyê ceyran û awe ma ra nêgînê la gelo ê fikirîyenê ke ma şert û mercanê başan de yê? Çi heyf çîyêko winasîn çin o. Wexto ke ma nêweş kewenê, ma nêeşkenê meymanêk zî bigîrê. Seba ke cayê ma çin o ma nêeşkenê ê kesan bi ca bikerê. Her çî yewbînan rê girêdaye yo.”
‘Ganî her kes bi hawayêk têduştî têbigiro’
Fatma Kubata ke erdlerz ra xelisîyaybî zî vat ke ê derûdorêk baş de nêciwîyenê û vat, “Ez kîradar a. 2 serrî, ma mecbûr mendê ke konteynerî de bimanê. Hema banî teslîmê wayîrê banan nêkerdê. Ma nêzanê do key bidê kiradaran. Ganî bi hawayêkê têduştî nêzdîyê her kesî bibê.”
