Kongra Star a kantonê Cizîrî bi eşkerayîyêk dîyar kerd kerd ke semedê Rayberê Şarê Kurdî Abdullah Ocalanî hezar û 800 mektubî Qamişlo de antê pêser û do hewl bidê ke ê mektuban teslîmê Neteweyanê Yewbîyayen bikerê.
Kongra Star a kantonê Cizîrî şaristanê Qamişlo yê Vakur û Rojhelatê Sûrîye de 1ê teşrîna verêne ya 2025î de kampanyaya Rayberê Şarê Kurdî Abdullah Ocalanî rê mektubnuştişî daye destpêkderdene. Kongra Star bi eşkerayîyêk encamê kampanyayî dîyar kerd û îfade kerd ke hezar û 800 mektubî nuştê û do Neteweyanê Yewbîyayeyan rê bierşawê. Eşkerayî verê Merkezê Kongra Starî yê taxa Xerbî yê Qamişlo de û bi beşdarbîyayîşê sazgeh û rêxistinanê cinîyan ameye dayene. Verfeka Kongra Star a Qamişloyî Rîhan Temo ra ameye wendene.
Rîhan Temo dîyar kerd ke seba demokrasî û têduştî Kongra Star beşdarê kampanyaya “Ez wazena Rayber Abdullah Ocalanî bivîna” bîya û wina domna: “Semedê caardişê edalet, demokrasî, aştî û têduştî, Kongra Star beşdarê kampanyaya ‘Ez wazena Rayber Abdullah Ocalanî reyde azad biciwîya û ey bivîna’ bîya. Semedê na kampanya Qamişlo de çalakî ameyî viraştiş. Semedê vengdayîşê Aştî û Awankerdişê Komelê Demokratîkî, Qamişlo de rayîrşîyayîşî ameyî viraştiş. Kongra Star û cinîyê Herême serkêşîya rayîrşîyayîş û çalakîyan kerd. Sewbîna, panelî rolê Rayber Apoyî Aştî û Awankerdişê Komelê Demokratîkî ser o û Çareserkerdişê Meseleyê Rojhelatê Mîyanênî ser o ameyî viraştiş. Manîfestoyê Aştî ame wendiş û fikrê şarî ameyî girewtiş.”
Rîhan Temo tewr peyên derheqê mektubê ke hetê cinîyanê herêmî ra semedê Rayberê Şarê Kurdî Abdullah Ocalanî ameyî nuştîş de dîyar kerd ke agahî dayî û vat: “Cinîyan bi hêvîya ke Rayber Apo bi fîzîkî bîvînê, hezar û 800 mektubî nuştê. Nê mektuban de hêvîya girde semedê ke rayîrê qanûnî vernîya Rayber Apo de bêrê akerdiş, ameyî vatiş. Çike Rayber Apo çareserkerdişê meseleyê Rojhelatê Mîyanênî de, teqezkerdişê aştiye de û qedînayîşê krîzanê ke ma ci ra derbas benê, ewro rolê xo yê tarîxî bi metodêko xurt û çalak kay bikero. Hemverê Komployê Mîyanneteweyî ke Rayber Apo ser o ame kerdiş ke waştî bi rayîrê komployî îradeyê şaran, bi taybetî yê şarê kurdî, bişiknê, ma têkoşîn kenê. Ma nê komployî şermezar kenê. Ma wazenê ke Rayber Apo bi fîzîkî azad bîvînê.”
