Qeyûmê Şaredarîya Êlihî Kuçeyê Dîyarbakir yê şaristanî de darî wekerdê. Temsîlkarê şaristanî hemverê wekerdişê daran vejîyayê. Wekerdişê daran vizêr şand her çend ame vindarnayene zî nê serê sibayî reyna dest pêkerd.
Şaredarîya Êlihî hetê qeyûmî ra ameya destsernayene. Emrê qeyûmî ser o Kuçeyê Dîyarbakirî yê tewr qelabalixî de bi nameyê hîrakerdişê rayîrî, dest bi wekerdişê daran kerd. Temsîlkarê şaristanî hemverê wekerdişê daran vejîyayê û no ame vindarnayene. Hemşaredara Êlihî Gulîstan Sonuk û Yeşîl Işik ê ke herinda înan de qeyûm ameyo tayînkerdene, rayberê DBP, DEM Partî, rayberê rêzxistinê sivîl û xeylê welatijî hemverê wekerdişê daran vejîyayê. Nerazîbîyayîşê temsîlkaranê şaristanî ser o wekerdişê daran ame vindarnayene. Serê sibayî ekîbê şaredarî çimdarîya polîsan de reyna dest bi talankerdişê daran kerd. Vizêr pêroyê şewe hemşaredarê Êlihî, rayberê partîyan û rêxistinê sivîlî nobetê daran girewt û dem bi dem mabênê girse û polîsan de kaos vejîya.
