Besta de Ebdulmenaf Bayikî îfade kerd ke qoricîyan bêdestûr û bêxeber baxçeyê înan ê bi serran birnayo û wexto ke înan waşto ke asteng bikerê bi çekan tehdît kerdo.
Şirnex de çiqas muracaatî bîyî zî Besta, Gabar, Cûdî û dewanê ci de birnayîşê daran bi hawayêko sîstematîk dewam keno. Erdê dewijan bi destûrê walîtîye û bêxebera înan, bi çimdarîya leşkeran hetê qoricîyan ra yeno yenê birnayene; dewijê ke tereaksîyon danê yan zî wazenê asteng bikerê hetê qoricîyan ra yenê tehdîtkerdene.
Se ra 14ê daristanî talan bîyo
Birnayîşê daran ke bi destûrê walîtîye dest pêkerd û serran o dewam keno, rîyê birnayîşan ra se ra 14ê daristananê bajarî talan bîyî, qoricîyê ke daran birrnenê û roşenê benê dewlemend.
Talanê daran uydu ra zî aşkera aseno; qoricîyê ke daranê ciwan yan zî pûçan bêferq birnenê, na rey dest eşto baxçeyanê dewijan ser o.
“Bêxeber dekewtî baxçeyê mi û darê mi birnayî”
Ebdulmenaf Bayikî vat ke teqrîben 30 serran ra ver mecburîyetîya qoricîtîye ra dewanê xo ra ke ameyî veşnayene, ameyî vetene û baxçeyê înan hetê qoricîyan ra yenê birnayene:
“Tena yê ma ney, herême de gelekî erdanê dewijan de wina kerd. Dewê ma û erdê ma Besta de manenê. Wexto ke ma birnayîşî hesîyayî, ma şîyî herême. Herêmê ke tim qedexe beno ma nêeşkenê şêrê, êyê ke daran birrnenê û qoricîyî zaf asan şonê. Bêdestûrê ma baxçeyê ma de dest pêkerdbî ke daran bibirnê.”
“Bi çekan ma tehdît kerdî”
Bayikî vat: “Wexto ke şarê dewe reyde şîyî herême, qoricîyanê ke pê traktoran daran berdêne rastê înan ameyî. Ma pers kerd û înan vat ‘Walîyî destûr dayo’; labelê ma şî walîtîye pers kerd, înan vat ‘Eleqeyê ma pê çin o’. Ma vat birnayîşî vindarnê û no erdê ma yo, o wext zî înan ma ra vat ‘Ma eleqedar nêkeno, ma do bibirnê, şima tîya ra şêrê’. Ma nêşîyê û dewam kerd ke bibê asteng. Wexto ke ma reaksîyon da qoricîyan cade destê xo eşt çekanê xo û bi çekan ma tehdît kerdî û vat ‘Tîya ra şêrê’. Derheqê erdanê ma de zî nêverda ma qisey bikerê.”
“Na bêhuqûqî ganî biqedîyo”
Bayikî vat birnayîşê domdarî hem dewijan hem zî wayîranê heywanan rê zararêko girs danê:
“Her roje vernîya keyeyê mi ra kamyonan reyde bi daranê birnayeyan vîyarenê. Dewijê tîyayî ne awe peyda keno ne zî îzime/kolîyêk; labelê her roje bi tonan darî yenê birnayene. Ma naye vînenê ganê ma dejneno. Walîtî bi qeraranê qedexeyan nê birnayîşan asan kena û înan rê rayîr akena. Nê birnayîşî ma rê tu fayde nêdanê. Na bêhuqûqî û bêheqî ganî biqedîyo. Eke wina dewam bikerê yew dare zî nêverdanê.”
