Welatijî ke bi minasebeta Roşanê Qurbanî heywananê xo ardê qada bazarî ya qezaya Peyasî ya Amedî vanê ke ewro goreyê parî heywananê înan nêroşîyayenê û kok ra zerar kenê.
Welatijî ke bi minasebeta Roşanê Qurbanî qada herînayîş û roşnayîşê qurbanan a qezaya Peyasî de heywanan roşenê vatê ke no roşan de herînayîş û roşnayîş çin o û kok ra zerar kenê. Her serre bi minasebeta Roşanê Qurbanî sûke û qezayan de qadayanê herînayîş û roşnayîşê heywanan kenê. Welatîjî ke heywanan miqate kenê, seba rotişê heywananê xo, Roşanê Qurbanî pawenê. 10 rojî ya zî yew hefte verê Roşanê Qurbanî heywananê xo dewan ra anê sûke û qadayanê herînayîş û roşnayîşî de danê nawitiş. Serr bi serre, seba krîzê ekonomîkî êdî herînayîş û roşnayîşê qurbanan kemî beno.
Welatijî, yanî êyê ke heywanan miqate kenê, ewro herînayîş û roşnayîşê qurbanan ra nêrazî yê. Welatiji vanê ke seba krîzê ekonomîkî zaf o; cew, nîsk, ka û heme yêmê heywanan deyn kenê. Welatijî vanê ke cew bi deyn, gaçikan bi deyn û her çi bi deyn herînayî û kok ra zerar kenê.
Welatij Meheme Alkan ke heywanê xo ardê bazarî, vano ke zemanê zimegirtî de bi halêko dijwar kar û heywanan miqate kenê û perîşan benê, labelê demê anê qada bazarî heywananê înan nêroşîyayenê.
Welatij Miheme Alkan vir ard ke seba ke êdî zerar o, destê xo heywankarî ra kişenê û do şorê sûkan de hamalîye bikerê û wina va: “Seba krîzê ekonomîkî ma nêeşkenê kinc û solan xo rê bigîrê. Krîzê ma perîşan kerdê. Aşme de 75 hezar ma danê şivanan. Ma 30 ton cew herînawo, koka înan zerar o. Ma zemanê zimegirtî de koyan de nîmeyê vewre de perîşan bîyî, labelê herînayîşê cî yenê û wazenê ma heywanêkî 10-15 hezaran bidê înan. Halê ma tu hal nîyo. Parî ra ewro weşêr bî. Heywanê ke şîbî Mersîn nêroşîyayenê û înan newe ra peyser anê. Citkar êdî nêeşkeno zereyê xo cot kero. Lîtreya mazotî bîya 45 hezar. Roşane ameye, labelê ma hîna solî xo rê nêherîna.”
3 Rojî yo hîna 3 karî nêrotî
Welatij Xelîl Kara zî ard ziwan ke serr bi serre xerabtêr o û wina va: “Herînayîşê ci rê yenê wazenê ma heywanêkî 12 hezaran bidê. Torbeyê yêmî par 350 hezarî bi, nika bîyo 700 hezar TL. Ka hîna vayîya ey dîyar nîya. Mi seba rotişî 30 karî kerdê. 3 rojî yo tîya de yê, labelê mi hîna 3 karî nêrotê. Rojê 10 karan zî biroşî bi temam nêkeno.”
Bazarî de gêrenê, labelê nêherînê
Welatij Xiyasedîn Kose zî ard ziwan ke ewro rotiş kemî yo. Welatij Sînan Kara zî dîyar kerd ke înan karê xo dewa Kevirê Reşî ya Qerejdaxî ra ardê û wina domna: “Ewro herînayîş zaf kemî yo. Merdimî yenê bazarî kenê, labelê vaya înan rê zaf o. Bazarî de geyrenê, nînan raştî kenê, labelê nêherînê û şonê. Goreyê parî ewro rotiş zaf kemî yo. Ma nêzdî 40 heywanî ardê tîya. 3 rojî yo ma tîya de yê, labelê ma hîna 3 heb nêrotê.”
