Rayberanê DEM Partî yê Sêrte seba “Mîtîngê Azadîye” ke do 28ê hezîrane Amed de bêro viraştiş veng da ke şar tewrê mîtîngî bibo û wina vatî: “Berê ma pîya ê meydanî pirr bikerê ke Rayberê Şarê Kurdî û heme girewteyanê azadî, azad bikerê.”
Partîya Têdûştî û Demokrasî ya Şaran (Partiya DEM), Partîya Herêmanê Demokratîkan (DBP) û Têgêrayîşê Cinîyanê Azadan (TJA) seba azadîya fîzîkî ya Rayberê Şarê Kurdî Abdullah Ocalanî 27ê Hezîrane de Wan û Mersîn de û 28ê hezîrane de zî Amed û Stenbol de bi sloganê “Bi Rayberîya Azade ver bi Azadîye Şinê”, “Mîtîngê Azadîye” virazenê. Mîtîngê Amedî do 28ê hezîrane de Meydanê Îstasyone de saete 17:00 de dest pêbikero.
Hemsereka DBP’yî ya Pêroyî Çîgdem Kiliçgun Ûçar û siyasetmedaro Kurd Veysî Aktaş sey qiseykerdox tewrê mîtîngî benê. Û hunermendî Kadîr Çat, Pinar Aydinlar û Serhado zî mîtîng de konser danê. Seba mîtîngî bi rojan o şaristanê vakurê Kurdîstanî û Tirkîya de şaristan bi şaristan xebatî yenê kerdene.
‘Berê ma pîya ê meydanî pirr bikerê’
Rayberanê DEM Partî yê Sêrte Kiymet Mût derheqê mîtîngê azadîye de, veng da welatijanê Sêrte ke tewrê mîtîngî bibê û vat: “Seke yêno zanayene nê wextanê peyênan de yew proses dest pêkerdo. La heta nika hîna hetê dewlete Tirke ra tu gamêka şênbere nêerzîyaya. Seba ke gamê şênberî yê seba prosesî bêrê eştiş, ma do 28ê aşme de Meydanê Îstasyone yê Amedî de ‘mîtîngê azadîye’ virazenê. Berê ma pîya ê meydanî pirr bikerê. Wa Serekî û girewteyê siyasî bi şekleke fîzîkî azad bibê.”
‘No proses seba dewlete û seba ma zî raya tewr rasta’
Rayberê DEM Partî yê Sêrte Abdûlbakî Taşçi zî bi nê qiseyan veng da welatijanê Sêrte ke tewrê mîtîngî bibê: “Di serî yo Serok Apo prosesê ‘Aştî û Komelê Demokratîk’ dayo dest pêkerdene. No proses seba dewlete û seba ma zî raya tewr rasta. Seba ke dewlete zî gaman bierzo, Rayber Apo gamê ke bingeyê ci de heqîqet esto eştê. Ganî dewlete zî seba nê bi cesaret têbigêro û cesaretê Rayber Apoyî bivîno û vera nê game bierzo. Reyna seba azadîya fîzîkî ya Rayber Apo û heme girewteyanê siyasî bêro ca, do 28ê hezîrane de Amed de yew mîtîng bêro viraştene. Ma heme şarê xo yê Sêrte dawetê mîtîngê ke do Amed de bêro viraştene kenê.”
‘Ma pîya Rayberê Şarê Kurdî û girewteyan azad bikerê’
Hemsereka DEM Partî ya Sêrte Rewşan Arslane zî seba şarê Sêrte no vengdayîş kerd: “Di serran ra zêdeyî yo ke Rayber Apo yew proses dayo dest pêkerdene, la hîna hetê dewlete Tirke ra tu gamêka wina şênbere nêameya eştene. Seba ke gamê şênbarî bêrê eştene, çi destê Serekî ra yêno keno. Çike game nêeştê ma zî do 28ê aşme de Meydanê Îstasyone yê Amedî de mîtîngêk virazene. Vengê ma welatijanê Sêrte rê yo, wa bêrê ma pîya seba ke destê Serekî xurt bikerê û ma heme pîya tewrê mîtîngî bibê. Wa Rayberê Şarê Kurdî û heme girewteyê ke zindanan de manenê, pîya azad bikerê.”
‘Ma paweyê şarê xo yê Sêrte yê ke tewrê nê mîtîngî bibê’
Hemserekê DEM Partî yê Sêrte Kenan Bîlge zî wina vat: “Seke yeno zanayene nêzdîyê di serran o prosesê ‘Aştî û Komelê Demokratîk’ dest pêkerdo û dewan keno. Seba ke no proses aver şêro lazim o ke tayê gamê şênberî bilez bêrê eştene. Nê gaman ra yew azadîya fîzîkî ya Rayberê Şarê Kurdî birêz Abdullah Ocalanî û heme girewteyanê sîyasî ya. Seba ke no waştişê ma bêro ca 28ê hezîrane de Meydanê Îstasyone yê Amedî de ‘mîtîngê azadîye’ yeno viraştene. Bi nê amancî ma paweyê şarê xo yê Sêrte yê ke tewrê nê mîtîngî bibê.”
