Rayberîya Têgêrayîşê Azadîye yê Kurdî vat, hêzê gerîla yê ke Zap de bîyê û rîskê şerî înan ser o est bi, 16ê teşrîna peyêne de xo ant qadanê cîya û musaîd. Rayberîye dîyar kerd ke ê bawer kenê ke na game hetkarîya çareserîya meseleyê kurdî û aştîya Tirkîya biba.
Eşkerayîya Rayberîya Têgêrayîşê Azadîye de ame eşkerakerdene ke 16ê teşrîna peyêne ra pey hêzê gerîla yê herêma Zapî ke rîskê şerî înan ser o est bi, xo ant qadanê cîya. Rayberîye vat, “Ma na bawerîye de yê ke na gama ma ya newa do xizmetê çareserîya meseleyê kurdî, aştî û demokratîkbîyayîşê Tirkîya bikera.”
Eşkerayîya Rayberîya Têgêrayîşê Azadîye yê Kurdî wina ya:
“Eşkerayîya xo ya 26ê teşrîna peyêne de ke bi kombîyayîşê çapemenîye ame eşkerakerdene û 25 gerîlayê ma yê ke sînoranê Tirkîya ra xo ant Herêmanê Pawitişî yê Medyayî amade bîyê, ma dîyar kerdbi ke cayê ke rîskê şer ê sînorî ser o zî ma do tedbîranê vera şerî bigîrê. Ê wextî ra heta nika bingeyê karo ke organanê wezîfedar kerd, ma Herêma Zap de resayê encamêko muhîm. Şandê 16ê teşrîna peyêne ra pey hêzanê yê ke herêma Zap de ke rîskê şerî tede est bi, ê cayan ra xo ant qadanê musaîd. Rewşa nikayîne reyde qada ke behsê ci yeno kerdene, tede rîskê şerî bi temamî orte ra wedarîya.
Xoantişê hêzanê ma yê gerîla yê cayanê bi rîskê şer ê mîyanê sînoranê Tirkîya ra, no sererastkerdiş û Herêma Zapî ra xoantişî reyde seba serkewtişê Prosesê Aştî û Komelê Demokratîkî ke Rayberê Şarê Kurdî Abdullah Ocalan rayra beno, bîyo hetkarîyêka muhîme ya pratîk û qerardarîya ma ya seba prosesî reyêka bîne mojneno. Ma na bawerî de yê ke na gama ma ya newa do xizmetê çareserîya meseleyê kurdî û aştî û de demokratîkbîyayîşê Tirkîya bikera.
Ma bi rêzdarî na agahî çapemenî û raya pêroyî reyde pare kenê, silamanê xo heme kesanê eleqedar rê erşawenê.
17ê teşrîna peyêne ya 2025î
Rayberîya Têgêrayîşî”
