Rayberîya Xosere ya Vakur û Rojhelatê Sûrîyeye dîyar kerd ke heqê şaran bi fermananê demkîyan nê, bi qanûnê bingehîn ê domdarî eşkenê bêrê garantîkerdene. Rayberîye aşkere kerd ke: “Çareserîya bingehîne ya Sûrîyeyî; dîyalogêko neteweyî yo hempar û qanûnêko bingehîn ê demokratîk û ademî-merkezî de ya ke hemkarîyêka raşte mîyanê heme Sûrîyeyîyan de mîsoger keno.”
Rayberîya Xosere ya Demokratîke ya Vakur û Rojhelatê Sûrîyeye, derheqê fermanê bi numreyê 13yî ke Serokkomarê Demkî yê Sûrîyeyî Ehmed El Şarayî şew de îmza kerdî bi, eşkerayîyêka nuştekî dabi.
Fermanê Şarayî yê ke vîzêr îmza kerdî de amebî vatene ke derheqê kurdan de tayê heqê kulturî ameyê qebulkerdene.
‘Şarayî derheqê kurdan de ferman îmza kerd’
Eşkerayîya Rayberîya Xosere de ame vatene ke ê fermanê Şarayî teqîp kenê û nê nuqtayî ser o vindertî: “Heqî bi fermananê demkîyan nê; bi qanûnê bingehîn ê domdarî yê ke îradeyê şaran û heme pêrabesteyan nîşan danê, eşkenê bêrê mîsogerkerdene.”
Qanûnê bîngehîn ê zafreng û demokratîk ferz o
Eşkerayîya Rayberîya Xosere de nê xusûsî ameyî destnîşankerdene:
“Nîyetê ci çi bibe wa bibe, heta ke fermanêk nêkewo mîyanê çarçeweya qanûnê bingehîn ê hemparî, nêeşkeno semedê heqanê pêrabesteyanê Sûriyeyî bibo garantîyêka raşte. Na çarçewe de ma sey Rayberîya Xosere ya Demokratîke, sey Peymana Komelî ya Demokratîke ya Rayberîya Xosere de zî bi eşkerayî ameyo vatene; ma ser o vindertene ke amadekerdişê qanûnê bingehîn ê zafreng û demokratîkî ke heqanê heme pêrabeste, şar û bawerîyanê Sûrîyeyî bipawîyo û mîsoger bikero, ferz o. Çîke na pîlî û zafrengî, çimeyê qewet û rûmetê Sûrîyeyî ya.”
Fermanê dûrî hewîyan o
“Her çend mumkun bo ke merdim nê fermanî sey gamêka verêne bivîno zî, na game semedê şarê ke bi bedelanê girdan şoreşêko raştî viraşto ke heqanê xo yê meşrûyan bigîrê û dewletêka demokratîke ya ke ser o adalet, seyyewbînanîye û cuyêka azade esta awan bikerê, dûrê hêvî û bendemendeyanê înan o.”
Dîyalogo hempar û qanûnê bîngehîn ê ademî-merkezî
Rayberîya Xosere ya Demokratîke reyna vira vîst ke, meselaya heq û azadîyan û çareserîya bingehîne ya Sûrîyeyî; bi dîyalogêko neteweyî yo hempar û qanûnêko bingehîn ê demokratîk û ademî-merkezî de ya ke hemkarîyêka raşte mîyanê heme Sûrîyeyîyan de mîsoger keno û dewletêka ser o adaletê civakî û hemwelatijîye awan keno.”
