Amed de bi sloganê “Wa heqê hêvî bêro caardene” hetê OHD’yî ra rayîrşîyayîş ame kerdene. Eşkerayî de vengdayîş ame kerdene ke wa serûberkerdişê qanûnî bêrê kerdene.
Komela Huqûqnasan a seba Azadîye (OHD) bi sloganê “Wa heqê hêvî bêro caardene” Amed de rayîrşîyayîş organîze kerd. Rayîrşîyayîşo ke vernîya Ulu Camî yê Sûrî de ame destpêkerdene, vernîya Edlîyeya Amedî de qedîya. Avûkatî pê cubeyanê xo tewrê rayîrşîyayîşî bîyî, temsîlkaranê partîyanê sîyasî û rêxsitinanê komelê sîvîlî zî paştî daye ci.
Badê rayîrşîyayîşî eşkerayî ameye dayene û ame waştene ke wa “heqê hêvî” yo ke hetê Mehkemaya Heqanê Merdiman a Ewropa (MHME) ra ame girewtene, bêro caardene.
Hemsereka Pêroyî ya OHD’yî Ekîn Yeter îfade kerd ke no heq merkezê Prosesê Aştî û Komelê Demokratîkî de yo veng da ke wa qerarê MHME’yî cade bêrê caardene.
Eşkerayî de ame vîrvistene ke cezaya muebedê giranî ganî badê 25 serran newera bêra erjnayene û ame vatene ke Tirkîya rixmê hîşyarkerdişê Komîteya Wezîran a Konseya Ewropa zî serûberkerdişê qanûnî nêkerdî. Reyna ame vatene ke “heqê hêvî” tena yew kesî nê bi hezaran girewteyan eleqedar keno.
OHD’yî veng da meclîs û Wezaretê Edaletî ke wa semedê caardişê “heqê hêvîye” serûberkerdişê qanûnî bêrê kerdene. Eşkerayî de ame vatene ke na game semedê aştîya domdare û çareserîya demokratîke şerto bingeyîn o.
Serekê Baroyî yê Amedî Abdulkadîr Guleçî zî îfade kerd ke “heqê hêvî” tena yê kesêkî nîyo, heqê her kesî yo ke cezaya muebedî dîyaya ci û vat ganî mevzuatê cezaya înfazî de bedilnayîş bêro kerdene.
