Ajansê Xeberan ê Çalakîkeranê Heqanê Merdiman yê Îranî (HERANA) dîyar kerd ke adare de Rojhelatê Kurdîstan û Îranî de 104 kesî ameyê dardekerdene. Heto bînî ra serra peyêne de zî Îran dde 29 cinîyî ameyê dardekerdene.
Komara Îranî ya Îslamî bi dardekedişan rojeve de ya. Bi taybetî zî serewedaritişê “Jin Jîyan Azadî” yê ke kiştişê cinîya kurde Jîna Emînî ya 16ê êlula 2022î ra pey dardekerdişê cinîyan hîna zaf bîyê. Îqtîdar bi zîhnîyetê camêrdî seba ke cinîyan heme qade de bêveng û bêtesîr bikerê bi manayanê tewir bi tewiran cinîyan darde kena.
Rêxistina Heqanê Merdiman ya Îranî ya ke merkezê ci Norveç de yo, rojanê ewilan yê emserrî de dîyar kerdbî ke mabênê serranê 2010 û 2024î de 241 cinî ameyê dardekedene. Ajansê Xeberan ê Çalakîkeranê Heqanê Merdiman yê Îranî (HERANA) zî dîyar kerd ke wisarê parî ra heta wisara emserrî Îran û Rojhelatê Kurdîstanî hezar û se (1300) kesî ameyê destbendkerdene. Goreyê Ajansê 29 cinî nê mabênî de ameyê dardekerdene. Nînan ra 168 kesî bê mehkema ameyê destbendkerdene. Goreyê HERANA’yî no demo dîyarkerde de 649 cinî yê Rojhelatê Kurdîstan û herêmanê bînan yê Îranî de ameyê destbendkerdene. Nînan ra 643 cinî seba ke dolbende nêeşta sereyê xo ser o, ameyê destbendkerdene.
Goreyê Rêxistina Heqanê Merdiman ya Îranî serra peyêne de hezar û 50 kesî Rojhelatê Kurdîstanî û Îranî de ameyê dardekerdene. Nînan ra 29ê ci cinî û 5ê ci gedeyê ke 18 serrî ra şenik bîyê. 189 kesan rê cezaya dardekerdişî ameya dayene. Mehkema nê kesan ra cazaya 55 kesî qebul kerda.
Îran roje de 4 kesan darde kena
Goreyê HERANA’yî adara 2025î de Rojhelatê Kurdîstan û Îranî de 104 kesî ameyê dardekerdene. Rejîmê Îranî adare de 22 kesan rê cezaya dardekerdişî daya û cezaya 5 kesan zî qebul kerda. Goreyê malûmatan Îran û Rojhelatê Kurdîstanî de roje de 4 kesî yenê dardekerdene.
Îran serrêk de 135 belucî û 104 kurdî darde kerdê
Kampanyaya ‘Sêşema Nê seba Cezaya Dardekerdişî’ ke 9ê çeleya 2023î de vera dardekerdişanê Rojhelatê Kurdîstan û Îranî ameye awankerdene, derheqê dardekerdişanê serra peyêne de malûmatê muhîmî kom kerdê. Kampanyaya ‘Sêşema Nê seba Cezaya Dardekerdişî’ dîyar kerd ke serra peyêne de hezar û 135 kes Îran û Rojhelatê Kurdîstanî de ameyê dardekerdene. Kampanyayî waşt ke heme şarê Îran û Rojhelatê Kurdîstanî vera dardekerdişan vindero. Kampanyayî gama xo ya 16. de girewteyanê 38 hepisxaneyanê Rojhelatê Kurdîstan û Îranî ra yenê pê, derheqê dardekerdişan de beyanatêk vila kerd û nê malûmatî pare kerdê: “Çeleya 2024î ra heta adara 2025î Rojhelatê Kurdîstan û Îranî hezar û 150 girewteyê ameyê dardekerdene û na hûmare ra zî 38ê ci cinî yê. Kesanê ke ameyê dardekerdne, înan ra 135ê ci beluc û 104ê înan zî kurd ê. Kampanya dîyar kena ke se ra 85 kesî ke ameyê dardekerdene, serdemê serekkomarî yê newe yê Îranî Mesud Pizîşkîyanî de ameyê dardekerdene.”
