Endamê Konseya Rayraberdişî yê PJAK’î Rêwar Awdananî vat ke PJAK ne wekîl o ne zî mîlîs o, warê sîyasî de aktorêko aktîf o û dîyar kerd: “Ma merkezê averşîyayîşan de yê. Bi hezaran kadroyê perwerdekerdeyî û rêxistinbîyaye ma de est ê.”
Awdananî vat ke adirbestê mabênê Îsraîl-Amerîka û Îranî vindertişêko kilm o: “Eşkera bî ke tena bi bombardûmanê hewayî û dormegirewtişanê deryayî, rejîm nêyeno rijnayene. La Amerîka û Îsraîl heta ke Komara Îslamî teslîm bibo, zordayîşê xo ra fek nêverdanê.”
Awdananî dîyar kerd ke endîşeyo bingeyin ê PJAK’yî pawitişê kurdan û heme şaranê Îranî yo: “Komara Îslamî şerêko zereyî vera şarê Îranî ferz kerdo. No şer demê şorişê ‘Jin, Jiyan, Azadî’ û qirkerdişanê çeleyê 2025î de resa zîrweyê xo.”
Awdananî vat ke PJAK hêzanê wekîl û mîlîsan ra cîya yo: “Ma de programêko demokratîko zelal seba Îran û Kurdîstanî est o. Çike ma sey ‘Rayîro Hîrêyin’ yenê naskerdene; sîyasetêko komel-merkez, demokratîk û vera tehakumî yo. Felsefeya ‘Jin, Jiyan, Azadî’ bingeyê ma yo.”
Awdananî dîyar kerd ke ê seba çareserîya meseleya kurdan û heme nasnameyê Îranî, modelê “Komara Demokratîk” pêşkêş kenê: “Modelê ma de her netewe ya nasnameyêk do bi heqê xoîdarekerdişî û statuyê xo yê sîyasî est bibo. Ma vera munaqeşakerdişê federalîzma demokratîke akerde yê.”
Awdananî peynî de îfade kerd ke eke şer reyna girr bo, projeya sîyasî dewam kena: “La goreyê şertanê warî, seba ke ma her tehdîdêk vera şarê xo hewanê, do heme kapasîteya xo bişuxulnê. Ma merkezê nê averşîyayîşan de yê û seba şarê xo her çî do bi qerardarîye biyarê ca.”
