Înîsîyatîfê Girewteyanê Nêweşan rê Azadîye da zanayîş ke rewşa  girewteyo nêweş Sabrî Yavuz giran bena û waşt Sabrî Yavuz lezabez bêro veredayîş.

Înîsîyatîfê Girewteyanê Nêweşan rê Azadîye hewteyê 614. ê çalakîya xo de Kuçeyê Sakarya yê Çankaya ê Anqara de derheqê girewteyo nêweş Sabrî Yavuzî de eşkerayîye da. Eşkerayîye ke endamê înîsîyatîfî şubeyê ÎHD’yê Anqara û pawitoxê heqê merdiman beşdar bîyî de, pankartê “Dermankerdiş heq o, nêyeno astegkerdiş, girewteyê nêweşî lezabez berê veradayene” ameyê aleqnayîş.

Raybera Şubeyê ÎHD’yî ê Anqara Asli Saraç îfade kerd ke Sabrî Yavuz 77 serre yo û 9 serrî yo ke Hepîsxaneyê Ewleyîya Berze yê Sîncanî de girewteyo. Aslî Saraç vat ke Yavuz Sabrî nêweşîyê giran ê sey hepatît-B, tuberkîloz, prostat, problemê zare û kataraktî rê têkoşîn keno û rixmê rewşa weşîya xo ya girane hema zî nêameyo veradayîş.

‘Ganî biserûber bêro dermankerdiş’

Asli Saraç diyar kerd ke Sabrî Yavuz vera nêweşîyanê xo yê giranan ganî bi hawayêko biserûber bêro dermankerdiş. Asli Saraç vat ke Sabrî Yavuz problemanê didanan, katarakt û kêmanîya vîtamî D’yî zî dej anceno, la nêno tedawîkerdiş.

Asli Saraç dewamîya qiseyê xo de îfade kerd ke Sabrî Yavuz tena hucreyêke de yeno girewtiş û vera tarîkerdişê pencereyanê hucre de nêeşkeno roşnîya tîje ra îstîfade bikero û vat: “Mendişê Sabrî Yavuz yê hepîsxaneyê, binpaykerdişê heqê weşîye û cuye ya. Waştişê ma zelal o; ganî lezalez Sabrî Yavuz bêro veradayîş û rayedarî goreyê heqê merdiman têbigêrê.”