SOHR’î dîyar kerd ke Sûrîye de 24 saetanê peyênan de 12 kesî ameyê kiştene.
Goreyê Merkezê Çimdarîya Heqanê Merdiman ê Sûrîye (SOHR), 24 saetanê peyênan de 24 kesî hedîseyanê cîyayan de ameyê kiştene.
SOHR’î derheqê babete de agahî pare kerde û da zanayene ke şaristananê Humusî de mabênê çarxerayîrê Tedmurs û herêma Dahîye de mabênê hêzanê ewlekarîya pêroyî ya hukmatê demkî yê Sûrîye û komêka çekdare de şer vejîya. Ame dîyarkerdene ke encamî de kesêk ameyo kiştene. Derûdorê şaristanê Mişrifî yê dewa Rojhelatê Humusî zî riyê gulevaranî ra 4 kesî ameyê kiştene.
Eynê merkezî dîyar kerd ke şaristanokê Selhebîya Rojavayê dewa şaristanê Reqa de mabênê di kesan de şer vejîya û encam de kesêk ame kiştene.
Şaristanê Bûkemal ê Rojhilatê Dêrazorî de hêrişê çekdaranê xeriban de 2 cinî ameyê kiştene. Şaristanê Ceblî yê Lazqîye de zî komêka çekdare kesêk remna û ci rê îşkence kerd, encamê îşkenceya girane de cuya xo vîndî kerde.
Şaristanê Nebik ê dewa Şamî de zî kesêk encamê gulevaranê hetê çekdaranê xerîban ra ame kiştene. Taxa Şexîr ya şaristanê Tertûsî de riyê nakokîyanê keyeyî ra lajekêk bi kardî pîyê xo kişt. Ame zanayene ke komêka çekdare dewa Meîsîra ya qezaya Wadî EL Iyûn a şaristanê Hema de eşt keyeyê welatijêkî ser o, dima welatijî dewe ra vet û ey kişt.
