Rojnameger Enver Aysevero ke seba qiseyanê xo yê programê YouTubeyî amebi girewtene destbendkerdene, mehkemeya ke tede ame muhakemekerdiş de bi sûcdarîya “kîn û dişmenîye rê şarê teşwîqkerdişî” ame tepiştene.
Rojnameger Enver Aysever, qiseyanê pîyê Serekê Şaredarîya Girde ya Stenbolî Ekrem Îmamogluyî, Hasan Îmamogluyî yê ke roportajê xo yê bi rojnameyê Sozcuyî de vatbi: “Mi têkoşîn da ke welatê ma rê komunîzm nêro” ser o nêrazîbîyayîşê xo mojna û va: “Rastgirîye sûc a. Wexto ke şima benê rastgir, şima benê bêexlaq yan zî exlaqê şima beno bêexlaqîye.”
‘Qiseyê mi çewt nîşan dayê’
Enver Aysever, medyaya sosyal de hedef nîşandayîşê xo ser o, da zanayene ke qiseyê ey ameyê çewt nîşan dayene û na eşkerayî da:
“Sey her tîmî qiseyê mi çewt nîşan dayê! Mi qiseyê Hasan Îmamogluyî şîrove kerdî. Tarîfê mi yê seba rastgiran wina bi; kesê ke malê dewlete xesp kenê, xozaye qir kenê, dindarê sexteyî, kesê ke netewperestîye şuxilnenê, zengînê îhaleyan. Tarîfê mi yê seba çepgiran zî wina bi; kesê ke welatê xo, merdiman, heywanan hes kenê û pawenê, kesê ke dinyayêka têduşte, adîl û azade wazenê. Yanî; dindarê raştkêrî zî, welatperwerê zerrîwaştî zî nê mîyan de yê, mi wina va. Mi bi mantiqêk nimûne da. Çi heyf ke bê ke weşanî temaşe bikerê, reyna mi hedef nîşan danê. Ez şaş bîya? Nê!”
Avukatê ci yo ke Mudirîyeta Emnîyetî ya Vatanî de Ayseverî reyde pêvînayîş kerd, va ke muwekîlê ey çarçewaya azadîya fikrî de rexne kerdo û weşan, medyaya sosyal de ser û binê ci ameyo birnayene û wina ameyo servîskerdiş, bi nê hawayî yew “îdrak” ameyo viraştene.
Aysever, temambîyayîşê karûbarê îfadeyî ra dima sewqê Hâkîmîya Cezaya Sulhî ame kerdene û uca bi sûcdarîya “kîn û dişmenîye rê şarê teşwîqkerdişî yan zî heqaretkerdişî” ame tepiştene.
