Rojnameger Nîhat Kayayî bale ant tecrube û kesayetê rojnameger Azîz Koyluogluyî ser o û vat ke bêvengîya muxalefet û hêzanê çepgîran bena sebebê hêrişê vera rojnamegeran.
Rojnameger Nîhat Kayayî qalê têkoşînê Azîz Koyluogluyî kerd ke 27ê çeleyî de, şaristanê Ranya yê Başûrê Kurdîstanî de, hetê artêşa tirke ra bi SÎHAyan amebi kiştene.
Nîhat Kayayî ard ziwan ke 2005î de o Azîz Koyluoglu şinasnayo û vat: “2005 de wexto ke mi dest bi karanê çapemenîye kerd Azîzî perwerde dayêne ma. Ey karê xo rê hûrmet kerdêne. Ey her wareyê çapemenîye de kar kerdêne, xeylê wezîfeyê ey est bîyî.
Ey tim tecrubeyê xo pare kerdêne. Xeylê embazê ma ewro bi saya ey rojnamegerîye musayê. Mîrasê Azîzî bi rayîrê rojnamegeranê ke ey ra perwerde girewto dewam keno. Ma xeylê wext pîya xebitîyayî. 2005î de Hewlêr de ma pîya xebitîyayî. Azîz jîr û jîhat bi. O eşkayêne merdiman de cade têkilîye rono. Ey meraq kerdêne, teqîb kerdêne.
Dewleta tirk tim wina bi eşkera hêrişê rojnamegeranê kurdan kena. Tay rojnamegerî bi hêrişanê hewayî, bi metodanê cîyayan ameyî qetilkerdene. Apê Musayî ra nata nê qirkerdişê rojnamegeran dewam kenê. Wexto ke Silêmanî de Gulîstane û Hêro ameybî kiştene Azîz bêveng nêmend. 19ê kanûne de zî dewleta tirk Nazim û Cîhan kiştê. Embazê ma Azîz zî bi eyn barbarîye ame qetilkerdene.
Wa her kes bizano ke eke bêvengîye biba dore do bêra şima. Nika rojnamegerê muxalîfî yew bi yew tepişîyenê. Yanî teda tena vera rojnamegeranê kurdan nêna kerdene. Bêvengîya muxalefet û hêzanê çepgîran bena sebebê hêrişê verba rojnamegeran.
Embazanê ma yê sey Azîz Koyluoglu, Seyît Evran ûsn. seba roşnîkerdişê raştîyan xîret kerd û ê nê sebebî ra ameyî kiştene. Seba tradîsyonê çapemenîya azade, seba şarê kurdî, seba dormeyanê çepan û sosyalîstan, seba muxalîfan şehadetê embazê ma Azîzî dejêko pîl o.”
