Tarîxê çapemenîya azade ya kurdan de, xeylî rojnamegeran seba ke heqîqetî biresnê şarî, bedelê giranî dayî. Denîz Fırate (bi nameyê xo yê nasnameyî Leyla Yildizhan) nê kedkaran ra yew a û sembolêka muhîma ya rojnamegerîya bêtersîye ya. Aye, cepheyê şerî de wexto ke wezîfeyê xo ser o bîye, seba ke vengê şarê xo û têkoşînê ci bido hesnayene, cuya xo feda kerde û bîye yewa şehîdanê çapemenîye.
Denîz Fırate, yanî Leyla Yildizhan, Wan de maya xo ra bîye. Keyeyêkê welatperwerî de bîye pîle. Na wesîle ra, hema domanîya xo de têkoşînê azadîye yê kurdan şinasna. Ewropayî de zî wextêk fealîyetê sîyasîyî yê ci bîyî. Seba nasname û bawerîya xo ya sîyasîye, Tirkîya de wextêk zîndan de mende. Zîndan seba aye bi cayo ke tede qerardarî û girêdayeyîya aye ya bi dewaya şarê xo hîna bîye xurt.
Dima ke zîndan ra vejîyaye, meşê xo ya heqîqete de mîsyonêkê neweyî girewt xo ser: rojnamegerîye. Aye waşt ke bi qelema xo bibo vengê înanê ke vateyê înan nîno hesnayene û şahîdîya tarîxî bikero. Nameyê xo Denîz Fırate kerd û bîye parçeyêkê kehenşopîya çapemenîya azade.
Denîz Fırate, rojnamegerîya masayî qebul nêkerde. Aye gore, rojnamegerêko heqîqî ganî uca bo ke heqîqet zî uca yo. Coka, wexto ke 2014 de leşkerê DAIŞ’î hêrişê Kurdistanê Başûrî û bi taybetî Şingal û Mexmûrî kerd, aye zî sey xeylê embazanê xo yê rojnamegeran cayê xo cephe de girewt. Ajansê Xeberan ê Firatî (ANF) rê wezîfe kerdêne.
Aye tena sey rojnamegere şerî teqîp nêkerdêne; eynî wext de cuya şervanan, dejê şarê sivîlî û xoverdayîşê vera tarîtîye nuştêne. Aye vatêne: “Ganî ma nê rojan binusê ke neslê neweyî bizanê ke nê rojî senî ameyî qezenckerdene.”
Vatena aye ya “Eke ma nenusê, kam do binuso?” bîye sey wesîyetêk seba rojnamegeranê kurdan. Aye bi kameraya xo tarîtîya DAIŞ’î û bi qelema xo zî îrade û xoverdayîşê şervanan qeyd kerd.
Şehadet û sembolê qerardarîye
8ê Tebaxa 2014î de, wexto ke Kampa Koçberan a Mexmûrî de hêrişê DAIŞ’î teqîp kerdêne, bi parçeyêkê şarapnelî yê ke leşkeranê DAIŞ’î eşto, zerrîya aye ra birîndar bîye û uca şehîd biye. Şehadetê Denîz Fırate, çapemenîya kurdan de û mîyanê şarî de dejêko pîl viraşt. La eynî wext de, bîye sembolê qerardarîye.
Mîrasê ke Denîz Fırate verada, ewro bi kedê bi seyan rojnamegeranê cinî û camêrdan yê ke meşê aye de şinê, dewam keno. Aye îsbat kerd ke rojnamegerîye tena nuştişê xeberan nîya, eynî wext de şahîdîya tarîxî û wayîrvejîyayîşê heqîqetî yo. Nameyê Denîz Fırate, sey yew estereya geşe tarîxê têkoşînê azadîye û çapemenîya kurdan de her tim do biriqîyo.
