Rojnameger Baran Germîyanî û Aslan Aslan merasîmê îmhakerdişê çekan erjna û dîyar kerd ke înan şahîdîya merasîmêko tarîxî kerdo û var Grûba Aştî û Komelê Demokratîkî aştî û çareserî de qerardar a û tîya ra pey dore ya dewlete ya ke gamanê tarîxîyan bierza.
Vengdayîşanê Rayberê Şarê Kurdî Abdullah Ocalanî û qerarê xofesihkerdişê PKK’yî ra pey, grûbêka gerîlayan a ke nameyê “Grûba Aştî û Komelê Demokratîkî” dabi xo, bi merasîmêko tarîxî çekê xo îmha kerdê û şerê çekdarî qedêna.
Bi seyan sîyasetmedar, zanyar, nuştox, pawitoxê heqanê merdiman, rojnameger û welatijan şahîdîya merasîmê îmhakerdişê çekan kerd.
Rojnameger Baran Germîyanî û rojnameger Aslan Aslan zî uca ade merasîmî nêzdî ra taqîb kerd û çimdarîyê xo ajansê ma rê vatî.
Edîtorê RojNewsî Baran Germîyanî dîyar kerd ke seke yeno zanayene Rayberê Şarê Kurdî vengda gerîlayan ke qeraranê kongreya xofesihkerdişî bikerê pratîk û dest bi ronayîşê çekan bikerê. Germîyanî da zanayene ke encamê vengdayîşî de merasîmê îmhakerdişê çekan ame kerdene û wina vat: “Ma sey rojnameger cayê merasîmî de çimdarîyî kerd. Asta mîyanneteweyî de bi desan sîyasetmedar, rojnameger, akademîsyen û nuştoxan merasîmî taqîb kerd. Heyecanêko zaf pîl qada merasîmî de est bi. Bi seyan kesê ke protokol de bîyê, bi çepik û berzkerdişê sloganan grûba gerîlayan pêşwazî kerd.”
‘Cayê merasîmî de atmosferêko zaf bi heybet est bi’
Germîyanî îfade kerd ke demê veşnayîşê çekan de heme kesê ke uca ade bîyê, bi hesret gerîlayan ra ewnîyayêne û vat: “Gerîla bi îradeyo xo yo azad çekê xo ronayî û veşnayî. Cayê merasîmî de atmosferêko zaf bi heybet est bi. Ma kamî ra persayêne vatêne, na gamêka tarîxî ya. Her kesî vatêne, gerîla gamêka zaf tarîxî eşte. Her kesî vatêne ‘Birêz Ocalanî gamêka tarîxî eşta û no yo gerîla zî cewab dano ey. Seba averberdişê meseleyê kurdî û aştî û komelê demokratîkî ganî dewlete gaman bierza.’ Her kes bi gameeştişî gerîla zaf keyfweş bi.”
‘Kêfweşîya gerîlayan’
Germîyanî îfade kerd ke merasîm ra pey o şîyî gerîlayan het û înan reyde roportajî kerdî û wina vat: “Gerîla bi xo zî vatêne, ‘ma nêpawitêne ke hende kesî ma pêşwazî bikerê. Ma dî ke şar bi keyfweşî nêzdî bîyo. Ê çepik û sloganî seba ma bîyê hêz.’ Merasîm mîyanê atmosferêko zaf bi heyecan de virazîya.”
‘Mi qerardarîya gerîlayan dîye’
Germîyanî da zanayene ke Besê Hozat vana, ‘Ma wazenê êdî seba azadîye û mîyanê şarî de bixebitîyê. Ma wazenê çekî orte ra wedarîyê. Êdî gerîla amade ya seba heme çîyanê ke nameyê aştî û komelo demokratîk ser o bêrê kerdene.’ Mi zî merasîm û roportajan de dî ke gerîla seba çareserî qerardar ê.”
Heybet xo uca de nîşan da
Pêşkêşkarê Stêrk Aslan Aslan zî di hewte yo ke Silêmanî de hedîseyanê derheqê merasîmî de taqîb keno, îfade kerd ke seba tarîxê 11ê temmuze ya 2025î rojêka tarîxî ya û wina vat: “Ma game bi game bîyê şahidê na roja tarîxî. Ma dî ke gerîlayanê Kurdîstanî merasîmêko senî bi heybet kerd. Heybetê gerîlayanê Kurdîstanî xo uca de nîşan da. Bi rastî zî heme çî amebi amadekerdene. Cayê merasîmî zî amebi weçînitene ka uca cayêko senî tarîxî yo. Grûba gerîla ke bi pêşengîyan Besê Hozat, bi pêşengîya cinîyêk ame uca, o bi sereyê xo mesajêk bi.”
‘Ganî qanûnî bêrê amadekerdene’
Aslan bale ant amadekerdişê qanûnan ser o û qiseykerdişê xo wina domna: “Merasîmî de zî ame dîyarkerdene le esasê ke qanûnî bêrê amadekerdene ser o do no proses aver şêro. O semedî ra nê esasî ser o çekê xo îmha kerdê. Her keso ke amebi uca, paweyê a game bîyê ke do merasîm çi wext bibo. Peynîya peyên de grûba gerîla bi heybet ameye û her kes bi heyecan bi. A heybetîya grûbe kerd ke hîsî bikewê zerrîya her kesî. No merasîm qedîyayîş nîyo, qonaxêk û destpêko newe yo. Na gama tarîxî ameye eştene û qonaxo newe dest pêkerd. La tîya ra pey ganî rol û berpirsîyarîya dewleta tirke bikewa dewre û na reye çimê her kesî dewlete de yê.”
‘Bi qiseykerdişan proses aver nêşono, ganî gamî bêrê eşetene’
Aslanî bale anr eşkerayîya peyêne ya Serekkomar Tayyîp Erdoganî ser o û nê çîyî vatî: “Helbet Erdoganî zî qisey kerd, la bi qiseykerdişan nêbeno. Lazim o gamê şênberî bêrê eştene ke her kes bawer biko. Bi qiseykerdişan no proses aver nêşono. Nika zî her kes paweno ke gamê tarîxî hetê dewlete ra bêrê eştene. No di hewte yo ke hetê dewlete ra gamê tarîxî bêrê eştene. Her kes Silêmanî de û her ca de paweyê gamanê dewlete yo. Her kes vano bawerîya ma bi birêz Ocalan û gerîlayan est a la vanê ke êî dewleta tirke zî wa îradeyê xo bimojna.”
Cidîyet û disiplînê gerîlayan
Aslanî çimdarîya xo ya derheqê îmhakerdişê çekan de zî vat û wina dewam kerd: “Gerîlayan çekê xo teslîmê tu hêz, tu dewletan nêkerdê, çekê xo nêkerdê binê herre; çekê xo veşnayî, îmha kerdî. Nîşaneyêkê teslîmbîyayîşî merasîmî de çin bi. O semedî ra kes nêeşkeno vajo gerîla û çekê xo teslîm bîyê. Bi îradeyê xo yo azad çekê xo îmha kerdê û gameeştişê xo nîşanê heme dinya da. Gerîlayan bi disîplînêko wînasîn nîşan da ke ka bi cîdîyetêko senîn têgêrenê û çareserî de senî bi israr ê. Erjayêne merdim vindertişê ê gerîlayan bivîno. Kes nêhuya, kes madê xo tirş nêkerd. Xo nêleqnayêne. Vengê sloganê ‘Bijî Serok Apo’ ê koyan de gulbang da. Her kes nê eşnawit.”
‘Hêz û îradeyê Ocalanî her kesî uca de kom kerd’
Aslanî dîyar kerd ke cayê merasîmî de hêz, îrade û qerardarîya Rayberê Şarê Kurdî Abdullah Ocalanî xo nîşan da û vat: “No hêz û îradeyê Rayber Apoyî her kesî uca de kom kerd. Her kesî ard uca û kerd yew. Senî? PDK, YNK, hukmatê Iraqî, rayedarê Tirkîya bi hêzê Rayber Apo ameyê uca. Cayê merasîmî de îradeyo azad xo nîşan da ke ekan ra pîlêr o. Amed nîşandayene ke têkoşîno demokratîk ê çekan ra giranêr o. Merasîmî ra pey zî dîyar bi ke barêko giran keweno milanê her kesî ser o.”
