Enstîtuyê Cigêrayîş û Zanîstî yê Kurdan Roşanê Ziwanê Kurdkî pîroz kerd û bale ant muhîmîya wayîrvejîyayîşê kurdkî ser o.
Enstîtuyê Cigêrayîş û Zanîstî yê Kurdan bi munasebetê 15ê Gulane Roşanê Ziwanê Kurdkî mesajê pîrozkerdişî pare kerd û bale ant tehlukeyê kurdkî ser o.
Mesajî de nê ameyî parekerdene: “Her netewe bi ziwanê xo yena naskerdene û namekerdene. Netewa ke ziwanê xo vîndî bikero nasnameyê xo zî vîndî keno. Verî ziwan bi dengbêjan, hîkaye û edebîyatkaran ganî mendêne. Destpêkê seserra 20. de dezgeh û rojnameyan de kurdkî ameye şuxulnayene ke bêro pawitene û bibo ziwano edebî.
15ê Gulana 1932î de binê îdareyê Celadet Alî Bedirxanî de Şam de bi herfanê latînan Kovara Hawarî ameye vetene. KNN’yî zî bi nê fehmî û berpirsîyarîye kombîyayîşê xo yê 2009î de 14, 15 û 16ê gulane sey Roşanê Ziwanê Kurdkî îlan kerd. No qeraro qiymetin hetê zafê kurdan ra ame qebulkerdene.
Çi heyf ke Vakurê Kurdîstan û teberê welatî de şarê ma vera ziwanî hîsdar tênêgêreno. No zî sey felaketêko gird vejîyeno vernîya ma. Wa no zaf hol bêro zanayene ke eke gedeyê yew şarî ziwanê dayîke de qisey nêkerê ameyoxê înan çîn o. Ma hêvî kenê ke pêro kurdî her warê cuye û perwerdeyî de bi hîssê berpirsîyarîya netewe wayîrê ameyoxê ziwanê kurdkî vejîyo û her warê cuye bibo kurdkî.
Wa şarê ma kurdkî qisey bikero, kurdkî binuso, kurdkî biwano, kurdkî bifikîrîyo, kurdkî biciwîyo! Gerek ma her şert de wayîrê ziwanê xo bivejê!”
