Ewro kadrajê Nazim Daştanî sey mîrasêk mendo. Kadrajê ey çarçewayêk o ke ruhê azadîye tede gandar o. Nazim Daştanî tena fotograf nêgirewtêne, bi makînaya xo tarîx nuşt û xoverdayîşê şarê kurdî azanê neweyan rê verda.
Nazim Daştan û Cîhan Bîlgîn di rojnameger ê ke seba rastîye cuya xo vîndî kerde. No hêriş tena seba rojnamegerîya azade vîndîbîyayîşêko gird nîyo, nîşaneyê hovîtîya hemverê resnayîşê rastîye yo. Kadrajê Nazim Daştanî fotorojnamegerîya kurd a.
Dinyaya rojnamegerîya şerî de tayê kadrajî est ê ke tena fotografêk gênê la vengê bêvengan, dejê bindestan û hêzê xoverdayoxan çarçewayêkî de kom kenê. Kadrajê Nazim Daştanî fotorojnamegero kurd a 32 serrî yo ke nê hêrişî de cuya xo vîndî kerde, nê kadrajanê bêhempa ra yew bi. Na rastîya hunerê ey o fotorojnamegerî bi. Nazim Daştanî makînaya xo seba resnayîşê rastîye sey amûrêk şuxulnaye û bi fotografanê xo rastîya Rojava û xoverdayîşê şarê kurdî qeyd kerd.
Nazim Daştan ê rojnamegeranê ewilin ra bi ke xoverdayîşê Kobanî resan dinya. Serra 2014î ra ey bi seyan fotograf şerê vera DAÎŞ’î de Kobanî ra bigîre heta xelasnayîşê Reqa, hêrişê Efrînî û xeylê cayanê bînan girewtê. Fotografê ey hovîtîya DAÎŞ’î, dejê sîvîlan û bi taybetî hêzê şervananê kurd mojna dinya. O fotograf tena xebere nêbîye, belgefîlm û raporanê heqanê merdiman de ame weşanayene.
Babetanê tewr balkêş ê kadrajê Nazim Daştanî ra yew zî cinîyê kurdî bîyê. Şervanê kurd yê bi rûkenî, bi çimanê qerardar, cinîyê azad û çalakî ke cuya rojane de bîyê sembolê şorişê Rojava. Fotografanê ey de ê cinî tena çekdar nêbîyê, la sembolê hêz, azadîye û hêvî bîyê. Ey hetê merdimîye yê Rojava, rolê cinîyanê komelî, xoverdayîş û hêvîya mîyanê şerî de bi hewayêko hunerî qeyd kerd. Sewbîna cuya rojane ya şaristananê sey Qamişlo, Kobanî û Hesekê, bazar, gede, merdimî ke pîya yê, bi hewayêko tesîrdar mojnayê.
Fotografanê ey ê namadaran ra yew zî o bi ke ala YPJ’yî herinda ala DAÎŞ’î de berz bena û bena sembolê serkewtişî hemverê tarîtî ke xelesnayîşê Reqa de ame girewtene. Fotografo bîn zî ke keyeyêko birîndar bombardumanê Efrînî de mojneno, xelata jurî ya taybete Musebaqaya Rojnamegerîya Musa Anterî de girewt. No kadraj rastîya şerî bi heme rastîya xo resna û Nazim Daştanî xeylê rojnamegeran cîya kerd.
Taybetmendîya kadrajê Daştanî no bi. Kompozîsyonê ey o sade û tesîrdar, background o kêm, bala temaşekerdoxan dej, hêz û xoverdayîşî de verdayêne. Ey tena şerî nê, hêz, dej û hêvîya şarê kurdî çarçewayêk de girewtêne dest. Çarçewayêka ke rastî, edalet û ruhê azadîye tede gandar o. Ewro kadrajê Nazim Daştanî sey mîrasêk maneno. Nazim Daştanî tena fotograf nêgirewtêne, bi makînaya xo tarîx nuşt û xoverdayîşê şarê kurdî azanê neweyan rê verda.
