Rûniştişê dewayê rojnameger Abdurrahman Gokî yo ke semedê xebatanê xo yê pîşeyî û îdîayanê îtîrafker Umît Akbiyikî ra yeno dariznayene, ame kerdene. Qerarê qedexeyê vejîyayîşê teberê welatî yê Gokî nêame betalkerdene.
Rûniştişo 8. yê dewayê rojnameger Abdurrahman Gokî yo ke semedê xebatanê xo yê pîşeyî û îdîayanê îtîrafker Umît Akbiyikî ra bi îdîayanê “endamîya rêxistine” û “propagandaya rêxistine” yeno dariznayene, Mehkemeya Cezayanê Giranî ya Amedî ya 5. de ame viraştene. Gok û avûkatê ey Resûl Tamur û Mehmet Emîn Aktar rûniştiş de amade bîyî.
Komeleya Rojnamegeran a Dîcle Firatî (DFG), Komeleya Medya û Xebatanê Huqûqî (MLSA) û tayê rojnamegeran zî rûniştiş teqîb kerd.
Gok da zanayene ke semedê qerarê qedexeyê vejîyayîşê teberê welatî ra, o îcrakerdişê pîşeya xo de zehmetî anceno û wina va: “Ray ray ez fikirîna û vana, eke ez zîndan de bîyêne do hewlêr bîyêne. Qet nêbo mi do vatêne ez mîyanê çar dêsan de ya. Hem ez teber de ya, hem zî nêeşkena karê xo bikerî. Na rewşe rewşêka zehmet a.”
Gok waşt ke qerarê qedexeyî bêro betalkerdene.
Avûkatan Tamur û Aktarî zî waştişê ke eynî bî, ardî ziwan. Dozgerî zî mutalaaya xo daye û waşt ke tedbîrê kontrolê edlîyî yo mewcûd dewam biko.
Gok wina va: “Verî heta rûniştişê qerarî ez tewrê rûniştişan bîya. Dima ra dewa ameye akerdene û ez tewrê heme rûniştişanê aye zî bîya. Ez tîya de maya xo ra bîya, tîya de bîya pîl û karê xo tîya de kena. Ez wazena qerarê qedexeyê vejîyayîşê teberê welatî bêro betalkerdene.”
Taloqê 25ê Teşrîne ame kerdene
Mehkeme qerar da ke aqîbetê tehqîqatê ke hetê Serdozgerîya Komare ya Amedî ra ameyo destpêkerdene, bêro perskerdene. Waştişê wedaritişê qerarê qedexeyê vejîyayîşê teberê welatî ame redkerdene û mehkeme rûniştiş taloqê 25ê Teşrîne kerd.
Temsîlkarê Tirkîya yê Rojnamegeranê Bêsînoran (RSF) Erol Onderoglu dima rûniştişî ra qisey kerd û nê çîyî ardî ziwan: “Ma wazenê ke hîn zextî serê rojnamegerî de nêrê kerdene, ke hem welat de hem zî teberê welatî de şertanê zehmetan de xeberan bi raya pêroyî reyde pare kerdo û bi taybetî dima ke dîmenê Kemal Kurtî antî, ameyo hedefgirewtene.”
